ԱՄՆ-ն պատրաստ է վերականգնել Իրանի նկատմամբ ծովային շրջափակումը` հուշագրի պայմանների չկատարման դեպքում. Հեգսեթ
2 րոպեի ընթերցում
Պենտագոնի ղեկավար Փիթ Հեգսեթը հայտարարել է, որ եթե Իրանը չհետևի փոխըմբռնման հուշագրի պայմաններին, ապա ԱՄՆ-ն «ավելի քան կարող է վերականգնել երկաթե շրջափակումը», որն ապրիլից գործում էր իրանական նավահանգիստների նկատմամբ։ «Արմենպրես»-ի փոխանցմամբ՝ նրա խոսքերը մեջբերում է BBC-ն։
«Եթե Իրանը չանի այն, ինչ խոստացել է անել, այսինքն՝ հրաժարվի իր միջուկային զենքի նկրտումներից, ապա պատերազմի նախարարությունը այստեղ է և պատրաստ է վերսկսել, եթե անհրաժեշտ լինի», - հայտարարել է նա։
Հեգսեթը հավելել է, որ ԱՄՆ ցանկացած ռազմական գործողություն և բանակցություն կենտրոնացած կլինի Իրանի միջուկային զենքի վրա։
Նա նշել է, որ կան եվրոպական երկրներ, որոնք պատրաստ են օգնել մաքրել Հորմուզի նեղուցը ականներից։ Միևնույն ժամանակ նա ուղղակիորեն կոչ է արել Մեծ Բրիտանիային «անել ավելին, ծախսել ավելին»՝ հավելելով, որ Մեծ Բրիտանիան պետք է օգնի ԱՄՆ-ին, եթե նրան անհրաժեշտ լինի մուտք գործել Մեծ Բրիտանիայում և Դիեգո Գարսիա կղզում գտնվող ռազմական բազաներ։
ԱՄՆ-ի և Իրանի միջև հուշագիրը ստորագրվել է հունիսի 18-ի գիշերը։ Փաստաթղթի համաձայն՝ Իրանը և ԱՄՆ-ն, ի թիվս այլ բաների, դադարեցնում են ռազմական գործողությունները բոլոր ճակատներում և բացում Հորմուզի նեղուցը։ Նաև 60 օրվա ընթացքում կողմերը պետք է համաձայնեցնեն վերջնական համաձայնագիրը, որը թույլ կտա լուծել առավել հրատապ հարցերը։ Դրանցից գլխավորը համարվում է Իրանի միջուկային ծրագրի ճակատագիրը։