2 րոպեի ընթերցում
Վրաստանը չի շեղվի նախատեսված ուղուց՝ չնայած այն բանին, որ ԵՄ-ն շանտաժի է ենթարկում հանրապետության քաղաքացիներին՝ խոստանալով վերացնել անայցագիր ռեժիմը: «Արմենպրես»-ի փոխանցմամբ՝ այս մասին հայտարարել է Վրաստանի վարչապետ Իրակլի Կոբախիձեն:
«Ինչ վերաբերում է պարզեցված այցագրային ռեժիմի հարցին, երբ վրաց ժողովրդին անուղղակիորեն, տեղական գործակալների միջոցով սպառնում են անայցագիր ռեժիմի վերացմամբ, դա խոսում է այն ծանր իրավիճակի մասին, որում, մի կողմից, գտնվում է եվրոպական բյուրոկրատիան, իսկ մյուս կողմից՝ տեղական գործակալները: Ծանր դրություն: Նրանք ոչնչի չեն հասնի՝ մարդկանց ճնշելով և սպառնալիքներով, քանի որ վրացական հասարակությունը լավ ըմբռնում է այն գործընթացները, որոնք զարգանում են մեր շուրջը: Այդպիսով, շանտաժը չի անցնի», - Կոբախիձեի խոսքերն է մեջբերում ՏԱՍՍ գործակալությունը:
Ավելի վաղ Վրաստանի արտաքին գործերի նախարարությունը հայտարարել է, որ հունիսի 11-ին Բրյուսելում բանակցություններ կկայանան վրացական կողմի հետ ԵՄ անայցագիր ռեժիմի և դրան առնչվող խնդիրների վերաբերյալ: Դա կլինի առաջին նման հանդիպումը Թբիլիսիի և Բրյուսելի հարաբերությունների վատթարացումից հետո:
Վրաստանի հարաբերությունները ԵՄ-ի և ԱՄՆ-ի հետ սկսեցին վատթարանալ այն բանից հետո, երբ Վրաստանի խորհրդարանը 2024 թվականի մայիսին ընդունեց, այսպես կոչված, «օտարերկրյա գործակալների մասին» օրենքը: Դրանից հետո ԱՄՆ-ն և ԵՄ երկրները սկսեցին պատժամիջոցներ կիրառել Վրաստանի իշխանությունների ներկայացուցիչների նկատմամբ:
Արևմուտքի դժգոհությունն են հարուցել նաև 2024 թ. հոկտեմբերի 26-ին կայացած խորհրդարանական ընտրությունների արդյունքները, երբ հաղթեց իշխող «Վրացական երազանք - Ժողովրդավարական Վրաստան» կուսակցությունը։ Վրաստանի վարչապետը 2024 թ. նոյեմբերի 28-ին հայտարարեց ԵՄ-ին Վրաստանի անդամակցության շուրջ բանակցությունների մեկնարկի գործընթացը սառեցնելու մասին։