2 րոպեի ընթերցում
Ծովային անօդաչուն, որը հայտնաբերվել է Ռումինիայի Կոնստանցայի քաղաքացիական նավահանգստի ջրատարածքում, ինքնաբերաբար պայթել է. զոհեր չկան: «Արմենպրես»-ի փոխանցմամբ՝ այդ մասին հայտնել է Ռումինիայի պաշտպանության նախարարության մամուլի ծառայությունը։
«Այսօր՝ հունիսի 5-ի առավոտյան, Կոնստանցայի քաղաքացիական նավահանգստում մոտավորապես ժամը 10:30-ին (Երևանի ժամանակով 11:30-ին) Ռումինիայի Ծովում կյանքերի փրկության գործակալության կենտրոնակայանից ոչ հեռու հայտնաբերված ծովային անօդաչուն պայթել է, զոհեր չկան», - ասվում է հաղորդագրության մեջ։
Ռազմական գերատեսչությունը չի նշել անօդաչուի ծագումը, սակայն հայտնել է, որ այն «ռումինական բանակի տեխնիկայի մաս չի կազմում և գործի չի դրվել զորավարժություններում, որոնք Պաշտպանության նախարարությունը վերջերս կազմակերպել է Սևծովյան տարածաշրջանում»։
Ըստ գերատեսչության՝ ծովային անօդաչուն «դասվում է անօդաչու սարքերի տեսակին, որոնք կիրառվում են Ուկրաինայի պատերազմում»։
Պատահարի վայրը շրջափակվել է Ռումինիայի տեղեկատվության ծառայության (պետանվտանգության), Ափամերձ պահպանության և Պաշտպանության նախարարության ուժերով։ Անօդաչուի բեկորներն ուսումնասիրվում են, Կոնստանցայի դատարանի դատախազությունը հետաքննություն է վարում: