Սոֆիայի համալսարանի INSAIT ինստիտուտն առաջատարն է ԱԲ համաժողովում ընդունված հոդվածների քանակով. BTA
2 րոպեի ընթերցում
Հոդվածը հրապարակվում է «Արմենպրես»-ի և BTA-ի միջև ստորագրված համաձայնագրի շրջանակում։
Բուլղարիայի կրթության նախարարությունը մայիսի 27-ին հայտարարել է, որ Սոֆիայի համալսարանի Համակարգչային գիտության, արհեստական բանականության և տեխնոլոգիաների ինստիտուտն (INSAIT) Արևելյան Եվրոպայում առաջին տեղն է զբաղեցրել, ինչպես նաև ԵՄ երկրներից լավագույն չորս հաստատությունների շարքում է հայտնվել արհեստական բանականության աշխարհի առաջատար CVPR (Computer Vision and Pattern Recognition) 2026 համաժողովում ընդունված հրապարակումների քանակով։ «Արմենպրես»-ի փոխանցմամբ՝ այս մասին հայտնում է Բուլղարիայի ազգային լրատվական գործակալությունը (BTA):
CVPR ամենամյա համաժողովը միավորում է ոլորտի առաջատար գիտնականներին և տեխնոլոգիական ընկերություններին։ 2026 թվականի համաժողովը կանցկացվի հունիսի 3-7-ը ԱՄՆ-ի Դենվեր քաղաքում, և ինչպես ակնկալվում է կներգրավի ավելի քան 10000 մասնակից։
Միջոցառմանը ներկայացվելու են բուլղարական հետազոտական հաստատության 17 գիտական հոդված։ Հոդվածների քանակով այն առաջ է անցել այնպիսի համալսարաններից, ինչպիսիք են Քեմբրիջի համալսարանը, Փրինսթոնի համալսարանը, Եյլի համալսարանը, ինչպես նաև Շվեդիայի, Ֆինլանդիայի, Իսրայելի, Ֆրանսիայի, Նիդեռլանդների և Իսպանիայի կրթական հաստատությունները։
Հոդվածները վերաբերում են ԱԲ այսօրվա ամենաառաջադեմ ոլորտներից մի քանիսին, ներառյալ ռոբոտաշինության համար արհեստական բանականությունը, տարածական դատողությունը, Երկրի դիտարկումը և այլն։
Սոֆիայում գտնվող INSAIT ինստիտուտն Արևելյան Եվրոպայի առաջին ինստիտուտն է, որն առաջարկում է համաշխարհային մակարդակի հետազոտական պայմաններ։
Ինստիտուտը գործում է որպես Սոֆիայի համալսարանի մասնագիտացված ստորաբաժանում և ստեղծվել է ETH Zurich-ի և Ecole Polytechnique Federale de Lausanne (EPFL)-ի հետ համատեղ, որոնք աշխարհի երկու առաջատար տեխնոլոգիական համալսարաններից են։