Միացյալ Նահանգները թույլ չի տա, որ Իրանը պատանդ պահի համաշխարհային էներգետիկ շուկան. Մարկո Ռուբիո
2 րոպեի ընթերցում
ԱՄՆ պետքարտուղար Մարկո Ռուբիոն և Հնդկաստանի վարչապետ Նարենդրա Մոդին հանդիպում են ունեցել Նյու Դելիում։
«Արմենպրես»-ի հաղորդմամբ՝ հանդիպման մանրամասների վերաբերյալ հաղորդագրություն է տարածել ԱՄՆ պետդեպարտամենտը։
Նշվում է, որ հանդիպմանը պետքարտուղարն ընդգծել է ԱՄՆ-Հնդկաստան գործընկերության ռազմավարական կարևորությունը, որը հիմնված է ընդհանուր ժողովրդավարական արժեքների, խորը տնտեսական և առևտրային հնարավորությունների, ինչպես նաև ԱՄՆ նախագահ Դոնալդ Թրամփի և Հնդկաստանի վարչապետ Նարենդրա Մոդիի միջև ամուր անձնական կապերի վրա։
Պետքարտուղարը նախագահ Թրամփի անունից Մոդիին հրավիրել է Սպիտակ տուն։
«Պետքարտուղարը և վարչապետը քննարկել են Մերձավոր Արևելքում ստեղծված իրավիճակը։ Պետքարտուղարն ընդգծել է, որ Միացյալ Նահանգները թույլ չի տա, որ Իրանը պատանդ պահի համաշխարհային էներգետիկ շուկան և հաստատել է, որ ԱՄՆ էներգետիկ արտադրանքը ներուժ ունի դիվերսիֆիկացնելու Հնդկաստանի էներգետիկ մատակարարումը»,- ասված է հաղորդագրության մեջ։
Նշվում է, որ պաշտոնյաներն անդրադարձել են վերջին երկկողմ ձեռքբերումներին, այդ թվում՝ նշանակալի ներդրումներին, որոնց շնորհիվ ԱՄՆ նախագահի և Հնդկաստանի վարչապետի պայմանավորվածության համաձայն՝ երկու երկրների միջև առևտուրը մինչև 2030 թվականը պետք է կրկնապատկվի։
ԱՄՆ Պետքարտուղարը և Հնդկաստանի վարչապետը համաձայնել են խորացնել առևտրի և պաշտպանության ոլորտում համագործակցությունը և արագացնել կարևորագույն և զարգացող տեխնոլոգիաների ոլորտում համագործակցությունը։