«Ինժեներական քաղաք»-ում տեխնոլոգիական նոր կենտրոն է կառուցվում

Երևանի «Ինժեներական քաղաք»-ում տեղի ունեցավ «Ինտտեգրալ Սոլյուշնս»  ընկերության կառուցվող գրասենյակի հիմնարկեքի արարողությունը։ Հայկական «Ինտտեգրալ Սոլյուշնս» ընկերությունը զբաղվում է կիսահաղորդիչների նախագծմամբ։

«Արմենպրես»-ի հաղորդմամբ՝ ՀՀ բարձր տեխնոլոգիական արդյունաբերության նախարար Մխիթար Հայրապետյանը, շնորհավորելով տեխնոլոգիական կենտրոնի հիմնարկեքի առթիվ, այն կարևոր իրադարձություն համարեց ինժեներական ոլորտի և հայաստանյան տեխնոլոգիական համայնքի համար։

«Մենք, հատկապես վերջին երկու-երկուսուկես տարիների ընթացքում, հաճախակի խոսում ենք այն մասին, որ արդեն ժամանակն է հասունացել, որ Հայաստանը հետզհետե ծառայություններ մատուցող երկրից վերածվի, վերաճի սեփական արտադրանք արտադրող ու աշխարհին առաջարկող, արտահանող տարածաշրջանային տեխնոլոգիական հանգույց։ Կարծում եմ, որ «Ինտեգրալ Սոլյուշնս» ընկերության գործունեությունը, մտահորիզոնը և առաքելությունը, լավագույնս համապատասխանում են Կառավարության կողմից որդեգրված հենց այս քաղաքականությանը: Կիսահաղորդչային ոլորտում տասնամյակներ շարունակ Հայաստանում առկա են գործընթացներ, մարդկային մասնագիտական կապիտալ, համագործակցություն տարբեր երկրների կորպորացիաների հետ, ինչպես նաև վերազգային ընկերություններ»,-իր խոսքում նշեց Մխիթար Հայրապետյանը։

Ըստ նախարարի՝ չնայած այդ ընկերությունները կարևորագույն դեր են խաղացել Հայաստանում համապատասխան էկոհամակարգի ձևավորման, միլիոնավոր դոլարների ներդրումների, ինչպես նաև մարդկային կապիտալի զարգացման գործընթացում, սակայն հասունացել է նաև կիսահաղորդչային նախագծմամբ զբաղվող հայկական ընկերություններ ստեղծելու ժամանակը։

Հայրապետյանը կարևորեց նաև նախատեվող կենտրոնում ընկերության կողմից Siemens-ի եզակի սուպերհամակարգչի (էմուլյատոր) տեղակայման ծրագիրը, որը թույլ կտա հայկական նախագծվող չիպերը թեստավորել հենց տեղում՝ նախքան արտադրությունը։

Նախկինում հայկական ընկերությունները ստիպված էին մեծ միջոցներ ու ժամանակ ծախսել արտերկրում չիպերի թեստավորումն իրականացնելու համար, քանի որ այս փուլը զբաղեցնում է չիպերի ստեղծման բյուջեի և ժամանակի՝ շուրջ 80%-ը։ 

«Ինտտեգրալ Սոլյուշնս» ընկերության հիմնադիր տնօրեն Էդուարդ Մուսայելյանի խոսքով՝ այսօր ոլորտը Հայաստանում բավականին հրապուրիչ է, քանի որ ստեղծվում են բազմաթիվ՝ ինչպես հայկական, այնպես էլ վերազգային ընկերություններ։

«Հայաստանը բացառիկ կետ է քարտեզի վրա, որտեղ վերազգային ընկերությունների կոնցենտրացիան, կարելի է ասել, ամենաբարձրներից է, եթե ոչ՝ ամենաբարձրը։ Մենք ունենք նաև շառուներ, որոնք փորձում են այս ամենն առաջ տանել՝ նախարարությունը, Ինժեներական ասոցիացիան, մեր ՏՏ գործատուների միությունը և «Ինժեներական քաղաք»-ը, ինչպես նաև այլ կառույցներ։ Բոլորս փորձում ենք մեկ գաղափարի շուրջ հավաքվել և ներդրումների համար Հայաստանը դարձնել հրապուրիչ՝ բնականաբար իրականացնելով նաև մարդկային կապիտալի զարգացման ծրագրեր»,-ասաց Մուսայելյանը։

«Ինժեներական քաղաք»-ում ընկերության նոր գրասենյակի հիմնարկեքի արարողությունն ամփոփվեց նախատեսվող շինության հիմքում հայկական մշակմամբ ռազմավարական ինտեգրալ սխեմաների ստեղծմամբ զբաղվող ընկերության զարգացման տեսլականն ու նպատակները պարունակող պատիճի տեղադրմամբ։