«Երկիրը երկիր չի» արտահայտությունն արդեն ուղարկված է պատմություն. Փաշինյան

Հայաստանում իրական երկրի իրական կառուցումը սկսվել է, և «երկիրը երկիր չի» արտահայտությունն արդեն անցյալում է մնացել։ «Արմենպրես»-ի հաղորդմամբ՝ Թումանյան համայնքի բնակիչների հետ հանդիպման ժամանակ այս մասին հայտարարել է «Քաղաքացիական պայմանագիր» կուսակցության վարչության նախագահ, արձակուրդում գտնվող վարչապետ Նիկոլ Փաշինյանը։

Փաշինյանը նշել է, որ վերջին տարիներին հաճախակի է շրջել Հայաստանի տարբեր բնակավայրերով, սակայն ընթացիկ նախընտրական քարոզարշավը առանձնահատուկ հնարավորություն է տվել ավելի խորությամբ տեսնելու երկրում տեղի ունեցող փոփոխությունները։

«Ազգային ժողովի նախագահի հետ ավտոբուսի մեջ նստած էինք, ասում եմ՝ տպավորություններս հենց կուտակվում է, ի վերջո արտահայտվում է։ Եվ ասում եմ՝ այնուամենայնիվ, մեզ հաջողվեց սկսել իրական երկրի իրական կառուցումը։ Ես դա եմ տեսնում, ժողովուրդ»,- ասել է նա։

Փաշինյանի խոսքով՝ «երկիրը երկիր չի» արտահայտությունն արդեն ուղարկված է պատմություն։

«Մեզ ձեզ հետ միասին հաջողվել է ստեղծել երկիր, ստեղծել պետություն, դնել բարեկեցության հիմքերը։ Այն արտահայտությունը, որ լավ է լինելու, երևի լավ կլինի, արդեն անցյալում է, որովհետև ոչ թե լավ է լինելու, այլ լավ է այսօր, լավ է հիմա, լավ է այստեղ»,- նշել է նա։

Փաշինյանը հիշեցրել է նաև 2021 թվականի ընտրությունների ժամանակ հնչեցրած «Ապագա կա» կարգախոսը՝ ընդգծելով, որ այդ ապագան, իր գնահատմամբ, արդեն իրականություն է դարձել։

«2021 թվականին մենք եկանք և ձեզ ասացինք, որ ապագա կա, դուք հավատացիք և վստահեցիք, և այսօր ես հպարտ եմ ձեզ ասելու, որ ապագան այսօր է, ապագան այստեղ է, ապագան հիմա է, և դուք հիմա կանգնած եք ապագայի մեջ, ապրում եք ապագայի մեջ»,- ասել է Փաշինյանը։

Մայիսի 8-ից Հայաստանում մեկնարկել է հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցում է 19 քաղաքական ուժ՝ 2 դաշինք և 17 կուսակցություն։

«Քաղաքացիական պայմանագիր» կուսակցությունը ընտրություններին մասնակցում է 16 համարի ներքո՝ «Տե՛ր կանգնիր խաղաղությանը» կարգախոսով։ Կուսակցությունը ԿԸՀ է ներկայացրել 283 թեկնածուից բաղկացած ընտրական ցուցակ, ինչպես նաև ազգային փոքրամասնությունների 10 թեկնածուից բաղկացած ցուցակ։ Կուսակցության վարչապետի թեկնածուն Նիկոլ Փաշինյանն է։