Նարեկ Կարապետյանը կոչ է արել ընտրել այնպիսի առաջնորդ, որ Գավառը նորից դառնա բրենդ

«Ուժեղ Հայաստան» դաշինքի ներկայացուցիչները Հայաստանում հունիսի 7-ին կայանալիք խորհրդարանական ընտրությունների քարոզարշավի շրջանակներում քաղաքացիների հետ հանդիպում են անցկացրել Գեղարքունիքի մարզի Գավառ քաղաքում։ 

«Արմենպրես»-ի հաղորդմամբ՝ Գավառում աջակիցների հետ հանդիպման ընթացքում ելույթ է ունեցել «Ուժեղ Հայաստան» կուսակցության քաղաքական խորհրդի անդամ, նախընտրական ցուցակը գլխավորող Նարեկ Կարապետյանը՝ ներկայացնելով իրենց ուժի նախընտրական ծրագրի մանրամասները։ 

«Վերջին 8 տարիների ընթացքում Գեղարքունիքում աղքատությունը աճել է, կարտոֆիլի, ցորենի ցանքատարածությունները 30-35 տոկոս անկում են ապրել, գործարանները փակվել են, իսկ մարդկանց ձուկ չեն թույլատրում բռնել»,-նշել է Կարապետյանը։

«Պետք է ընտրենք առաջնորդ, ով փոփոխություններ բերելու մեծ փորձ ունի, որպեսզի օրերից մի օր Գավառը նորից դառնա բրենդ, այստեղ լինեն աշխատատեղեր, որպեսզի այստեղ մարդիկ իրենց կյանքը գեղեցիկ կառուցեն։ Ամբողջ Սևանի տարածաշրջանում ստեղծվելու են ձկնաբուծարաններ, և Սևանա լիճը դառնալու է մեծ ձկնաբուծարան, մարդկանց հնարավորություն է տրվելու որս կատարել լճից և այն վաճառել այստեղ գտնվող գործարաններում»,-ասել է Նարեկ Կարապետյանը։

Մայիսի 8-ին մեկնարկել է Հայաստանում հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար գրանցվել է 19 քաղաքական ուժ՝ 2 դաշինք և 17 կուսակցություն։

«Ուժեղ Հայաստան» կուսակցությունը խորհրդարանական ընտրություններին մասնակցում է 3 համարի ներքո։ Կուսակցության կարգախոսն է՝ «Փոփոխություն»։ 

Կուսակցությունը ԿԸՀ է ներկայացրել 199 թեկնածուից բաղկացած ցուցակ, ինչպես նաև ազգային փոքրամասնությունների 3 թեկնածուից բաղկացած ցուցակ։

Դաշինքի առաջնորդ Սամվել Կարապետյանը, սակայն, ցուցակում ներառված չէ, քանի որ նա բացի ՀՀ քաղաքացիությունից, ունի նաև Ռուսաստանի և Կիպրոսի քաղաքացիություն, իսկ ՀՀ Սահմանադրության համաձայն՝ այլ երկրների քաղաքացիություն ունեցող անձինք չեն կարող լինել ո՛չ վարչապետի, ո՛չ պատգամավորի թեկնածու։   

Չնայած դրան՝ կուսակցության ներկայացուցիչները շարունակում են պնդել, որ իրենց վարչապետի թեկնածուն Սամվել Կարապետյանն է։ Սամվել Կարապետյանն այս պահին տնային կալանքի տակ է՝ իշխանությունը զավթելու հրապարակային կոչերի համար հարուցված քրեական վարույթի շրջանակներում։