«Լուսավոր Հայաստան»-ը քարոզարշավի 8-րդ օրը կսկսի նախագահական նստավայրի մոտից

«Լուսավոր Հայաստան» կուսակցությունը Հայաստանում կայանալիք խորհրդարանական ընտրությունների նախընտրական քարոզարշավը մայիսի 15-ին կսկսի Հայաստանի Հանրապետության նախագահի նստավայրի մոտից։ 

«Արմենպրես»-ի հաղորդմամբ՝ այս մասին կուսակցությունը հայտնել է «Ֆեյսբուքի»-ի իր էջում տարածած գրառմամբ։

Կուսակցության ներկայացուցիչները ՀՀ նախագահական նստավայրի մոտ կլինեն ժամը 11։00-ին։ 

Կուսակցության ներկայացուցիչները նախորդ օրերին քարոզարշավի շրջանակներում ակցիաներ են իրականացրել Բարձրագույն դատական խորհրդի, Հարկադիր կատարումն ապահովող ծառայության, Կենտրոնական բանկի շենքերի մոտ։ 

Մայիսի 8-ին մեկնարկել է Հայաստանում հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար գրանցվել է 19 քաղաքական ուժ՝ 2 դաշինք և 17 կուսակցություն։ 

«Լուսավոր Հայաստան» կուսակցությունը ընտրություններին մասնակցում է 19 համարի ներքո։ 

Կուսակցության կարգախոսն է՝ «Պաշտպանիր ինքնությունդ»։ 

Կուսակցությունը ԿԸՀ է ներկայացրել 89 թեկնածուից բաղկացած ընտրական ցուցակ, որը գլխավորում է կուսակցության նախագահ, ԱԺ նախկին պատգամավոր Էդմոն Մարուքյանը։