367.47
Մոլդովայի խորհրդարանը մտադիր է չեղյալ հայտարարել ԱՊՀ հարթակում ստորագրված հումանիտար համագործակցության վերաբերյալ համաձայնագիրը
2 րոպեի ընթերցում
Մոլդովայի արտաքին քաղաքականության և եվրոպական ինտեգրման խորհրդարանական հանձնաժողովը խորհրդարանին կառաջարկի չեղյալ հայտարարել Անկախ Պետությունների Համագործակցության (ԱՊՀ) անդամ պետությունների հումանիտար համագործակցության միջպետական հիմնադրամի ստեղծման մասին համաձայնագիրը՝ որպես Մոլդովայի Հանրապետության՝ ԱՊՀ համագործակցության մի քանի մեխանիզմներից դուրս գալու գործընթացի մաս։ «Արմենպրես»-ի փոխանցմամբ՝ այս մասին հաղորդում է Moldpress գործակալությունը։
Նախաձեռնությունը ներկայացրել է Մոլդովայի Հանրապետության մշակույթի նախարարությունը, որը պնդում է, որ համաձայնագիրը արդյունավետ չի եղել և օգուտներ չի բերել Մոլդովայի Հանրապետությանը։
2006 թվականին ստորագրված փաստաթուղթը նախատեսում էր ԱՊՀ անդամ պետությունների հումանիտար համագործակցության միջպետական հիմնադրամի ստեղծում, որը նախատեսված է մշակույթի, կրթության, գիտության, սպորտի, զբոսաշրջության, զանգվածային լրատվամիջոցների և երիտասարդական քաղաքականության ոլորտներում համատեղ նախագծերի ֆինանսավորման համար։ Իշխանությունների տվյալներով՝ համաձայնագրի վավերացումից ի վեր Մոլդովայի Հանրապետությունը վճարումներ չի կատարել և ֆինանսական գործունեություն չի իրականացրել հիմնադրամի շրջանակներում։
Մշակույթի նախարարությունը պնդում է, որ Մոլդովայի Հանրապետությունն այժմ իր միջազգային համագործակցությունն ուղղորդում է դեպի Եվրամիությանն անդամակցելու գործընթացին վերաբերող գործընկերություններ, այդ թվում՝ «Հորիզոն Եվրոպա» և «Ստեղծագործ Եվրոպա» ծրագրերը։
Նախարարության տեղեկացմամբ՝ այս հարթակներն ավելի շահավետ համագործակցության հնարավորություններ են առաջարկում մշակույթի, զբոսաշրջության, երիտասարդության, սպորտի և գիտության ոլորտներում, քան ԱՊՀ շրջանակներում իրականացվողները։
Իշխանությունները նշում են, որ համաձայնագրի չեղարկումն ԱՊՀ հարթակում ստորագրված պայմանագրերի վերանայման և ազգային քաղաքականությունը եվրոպական չափանիշներին ու նորմերին համապատասխանեցնելու ջանքերի մի մասն է։
Բաժանորդագրվեք մեր ալիքին Telegram-ում