«Ուժեղ Հայաստան»-ը քարոզարշավը շարունակում է Իջևանում, Դիլիջանում

«Ուժեղ Հայաստան» կուսակցության առաջին համար Նարեկ Կարապետյանը «Ֆեյսբուք»-ի իր էջում հրապարակված տեսանյութում ամփոփել է կուսակցության քարոզարշավային հանդիպումները Տավուշի մարզում՝ անդրադառնալով մարզի գյուղատնտեսական խնդիրներին և զարգացման ծրագրերին, ինչպես նաև ներկայացնելով կուսակցության անելիքները քարոզարշավի 6-րդ օրը։  

«Արմենպրես»-ի հաղորդմամբ՝ Կարապետյանը հայտնել է, որ կուսակցության ներկայացուցիչներն այժմ գտնվում են Իջևանում, որտեղ նախատեսված են հանդիպումներ բնակիչների հետ, իսկ երեկոյան նախատեսվում է համերգ Դիլիջանում։

Նա նշել է, որ նախորդ օրը կուսակցության ներկայացուցիչները եղել են Նոյեմբերյանում, Բերդում, ինչպես նաև մի շարք այլ համայնքներում, այդ թվում՝ Զորականում և Բագրատաշենում։

Կարապետյանի խոսքով՝ Բագրատաշենում քննարկվել են տարածաշրջանի զարգացման և ջերմոցային տնտեսությունների համար էժան գազի մատակարարման հնարավորությունները։

Նարեկ Կարապետյանն առանձնահատուկ ուշադրություն է դարձրել Նոյեմբերյանի և Բերդի գյուղատնտեսական խնդիրներին՝ նշելով, որ գյուղացիները լուրջ դժվարություններ ունեն մթերման հարցում։

«Գյուղացիները մթերման տեղ չունեն։ Հանում են, ճամփեզրին են դնում, վաճառում են իրենց բերքը»,- ասել է նա։

Կարապետյանի խոսքով՝ շատ համայնքներ գոյատևում են բացառապես ճանապարհի եզրին գյուղմթերք վաճառելու հաշվին։

Նա հայտարարել է, որ իրենց կուսակցությունն առաջարկում է ստեղծել մթերման կայանների ցանց, որը հնարավորություն կտա գյուղացիների արտադրանքը հավաքել և արտահանել։

Մայիսի 8-ին մեկնարկել է Հայաստանում հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար գրանցվել է 19 քաղաքական ուժ՝ 2 դաշինք և 17 կուսակցություն։

«Ուժեղ Հայաստան» կուսակցությունը խորհրդարանական ընտրություններին մասնակցում է 3 համարի ներքո։ Կուսակցության կարգախոսն է՝ «Փոփոխություն»։

Կուսակցությունը ԿԸՀ է ներկայացրել 199 թեկնածուից բաղկացած ցուցակ, ինչպես նաև ազգային փոքրամասնությունների 3 թեկնածուից բաղկացած ցուցակ։

Դաշինքի առաջնորդ Սամվել Կարապետյանը, սակայն, ցուցակում ներառված չէ, քանի որ նա բացի ՀՀ քաղաքացիությունից, ունի նաև Ռուսաստանի և Կիպրոսի քաղաքացիություն, իսկ ՀՀ Սահմանադրության համաձայն՝ այլ երկրների քաղաքացիություն ունեցող անձինք չեն կարող լինել ո՛չ վարչապետի, ո՛չ պատգամավորի թեկնածու։   

Չնայած դրան՝ կուսակցության ներկայացուցիչները շարունակում են պնդել, որ իրենց վարչապետի թեկնածուն Սամվել Կարապետյանն է։ Սամվել Կարապետյանն այս պահին տնային կալանքի տակ է՝ իշխանությունը զավթելու հրապարակային կոչերի համար հարուցված քրեական վարույթի շրջանակներում։