«Հայաստան» դաշինքի ներկայացուցիչները նախատեսել են քարոզարշավ անցկացնել Մարալիկ և Արթիկ քաղաքներում

Հայաստանում հունիսի 7-ին նախատեսված խորհրդարանական ընտրությունների քարոզարշավի շրջանակներում «Հայաստան» դաշինքի անդամները մայիսի 13-ին գտնվելու են Շիրակի մարզում։

«Արմենպրես»-ի փոխանցմամբ՝ այս մասին նշված է «Հայաստան» դաշինքի «Ֆեյսբուք»-ի էջում տարածված գրառման մեջ։

Նշվում է, որ նախընտրական հանդիպումների ժամանակացույցի համաձայն՝ դաշինքի ներկայացուցիչները կայցելեն Մարալիկ և Արթիկ քաղաքներ։

Մայիսի 8-ին մեկնարկել է Հայաստանում հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար գրանցվել է 19 քաղաքական ուժ՝ 2 դաշինք և 17 կուսակցություն։ 

«Հայաստան» դաշինքը խորհրդարանական ընտրություններին մասնակցում է 17 համարի ներքո՝ «Միասին կարող ենք» կարգախոսով։

Դաշինքը ԿԸՀ է ներկայացրել 213 թեկնածուից բաղկացած ցուցակ և ազգային փոքրամասնությունների 4 թեկնածուից բաղկացած ցուցակ։ 

Դաշինքը 2026 թվականի խորհրդարանական ընտրությունների համար ներկայացրել է նաև իր նախընտրական հիմնական շեշտադրումները, որոնց թվում են բանակի և անվտանգության համակարգի ուժեղացումը, Ռուսաստանի հետ ռազմավարական հարաբերությունների պահպանումը, փոքր և միջին բիզնեսի աջակցությունը, գյուղատնտեսության ապահովագրության ներդրումը, էլեկտրաէներգիայի ցերեկային սակագնի իջեցումը, գույքահարկի բարձրացման մեղմացումը կամ չեղարկումը, համատարած հայտարարագրման համակարգի չեղարկումը, սոցիալական աջակցության ծրագրերի ընդլայնումը, ինչպես նաև բնապահպանական և ջրային ռեսուրսների կառավարման ծրագրերը։