«Քաղաքացիական պայմանագիր» կուսակցությունը նախընտրական քարոզարշավի շրջանակներում Արագածոտնի մարզում է

Հայաստանում հունիսի 7-ին կայանալիք նախընտրական քարոզարշավի շրջանակներում «Քաղաքացիական պայմանագիր» կուսակցությունն այցելել է  Արագածոտնի մարզ՝ հանդիպումներ անցկացնելու մարզի մի շարք բնակավայրերի բնակիչների հետ։

«Արմենպրես»-ի հաղորդմամբ՝ այս մասին «Ֆեյսբուք»-ի էջում տարածված տեսանյութում նշել է արձակուրդում գտնվող ՀՀ վարչապետ, կուսակցության վարչության նախագահ Նիկոլ Փաշինյանը։

«Քաղաքացիական պայմանագիր» կուսակցության անդամներն արդեն բնակիչների հետ շփումներ են ունեցել Կարբի-Ուշի-Օհանավան բնակավայրերի խաչմերուկում, Շենավանում։

Կուսակցության անդամներն այժմ գտնվում են Արագած բնակավայրում։

Ավելի վաղ Նիկոլ Փաշինյանը նշել էր, որ հանդիպումների ժամանակացույցը հետևյալն է․«Պլանավորում ենք լինել՝ Արագած բնակավայրում, Ապարանում, Ալագյազում, Ծաղկահովիտում, Մաստարայում, Թալինում, Ուջանում, Օշականում, որից հետո կգանք Աշտարակ, որտեղ ժամը 19։30-ին՝ Ներսես Աշտարակեցու հրապարակում տեղի կունենա մեր մեծ հանդիպումը»։

Մայիսի 8-ին մեկնարկել է Հայաստանում հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար գրանցվել է 19 քաղաքական ուժ՝ 2 դաշինք և 17 կուսակցություն։

«Քաղաքացիական պայմանագիր» կուսակցությունը ընտրություններին մասնակցում է 16 համարի ներքո՝ «Տե՛ր կանգնիր խաղաղությանը» կարգախոսով։ «Քաղաքացիական պայմանագիր» կուսակցությունը ԿԸՀ է ներկայացրել 283 թեկնածուից կազմված ընտրական ցուցակ, ինչպես նաև ազգային փոքրամասնությունների 10 թեկնածուից բաղկացած ցուցակ։