Ռեֆորմիստների կուսակցությունը քարոզարշավը սկսել է 7 կետանոց ծրագրի ներկայացմամբ ու քայլերթով

Ռեֆորմիստների կուսակցությունը Հայաստանում հունիսի 7-ին կայանալիք խորհրդարանական ընտրությունների նախընտրական քարոզարշավը սկսել է կուսակցության ծրագրի 7 կետերի ներկայացմամբ։

«Արմենպրես»-ի փոխանցմամբ՝ կուսակցության նախընտրական ծրագրի 7 կետերն են.

1. Ստեղծված աշխարհաքաղաքական իրավիճակում ընդունել ազգային անվտանգության նոր հայեցակարգ։
2. Ձևավորվող դեմոգրաֆիկ սպառնալիքների պայմաններում մշակել պետական ծրագիր՝ ներառելով ներգաղթի կազմակերպում։
3. Սահմանադրական փոփոխությամբ երկրի ղեկավարի կառավարման ժամանակահատվածը սահմանափակել մեկ ժամկետով, իսկ երկրի ղեկավարի պաշտոնին հավակնողի համար սահմանել նոր չափորոշիչներ։
4. Հայաստանում ընտրություններին մասնակցելը դարձնել պատվավոր պարտականություն, իսկ ընտրագրավի մեխանիզմը փոխարինել ստորագրահավաքով։
5. Բարձրագույն կրթությունն ու առողջապահությունը Հայաստանում դարձնել անվճար և զգալիորեն բարձրացնել մանկավարժների ու բժիշկների աշխատավարձերը։
6. Տնտեսության մեջ մեծացնել պետության կարգավորիչ դերը։ 
7. Հայաստանը դարձնել կարգավորված, անվտանգ և գրավիչ կրիպտոկենտրոն տարածաշրջանում՝ ներգրավելով ներդրումներ, ստեղծելով աշխատատեղեր և բարձրացնելով տնտեսության թափանցիկությունը։

Կուսակցության վարչապետի թեկնածու, պաշտպանության նախկին նախարար Վաղարշակ Հարությունյանը մանրամասներ է ներկայացրել նախընտրական ծրագրի 7 կետերի վերաբերյալ, որից հետո կուսակցության ներկայացուցիչները քայլերթ են իրականացրել Երևանի կենտրոնում։

Ռեֆորմիստների կուսակցության նախագահն Ազգային ժողովի նախկին պատգամավոր Վահան Բաբայանն է։

Մայիսի 8-ին մեկնարկել է հունիսի 7-ին Հայաստանում կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար գրանցվել է 19 քաղաքական ուժ՝ 2 դաշինք և 17 կուսակցություն։