Maersk ընկերությունը հաստատել է, որ իր նավն անցել է Հորմուզի նեղուցով՝ ԱՄՆ ռազմածովային ուժերի պաշտպանության ներքո

Դանիական նավագնացության և լոգիստիկայի Maersk ընկերությունը հաստատել է, որ ԱՄՆ-ի դրոշի ներքո նավարկող իր նավն անցել է Հորմուզի նեղուցով՝ ամերիկացի զինվորականների պաշտպանության ներքո։ «Արմենպրես»-ի փոխանցմամբ՝ ընկերությունը հաղորդել է, որ անձնակազմի բոլոր անդամներն «անվտանգ են ու անվնաս»։

Maersk-ի հայտարարության համաձայն՝ Alliance Fairfax նավը գտնվում էր Պարսից ծոցում, երբ փետրվարին սկսվեց պատերազմը, և «չէր կարողացել այնտեղից դուրս գալ»։

Maersk-ը հաղորդել է, որ վերջերս իրենց հետ կապվել են ԱՄՆ-ի զինվորականները, որոնք «նավին Ծոցից դուրս գալու հնարավորություն են առաջարկել՝ ամերիկացի զինվորականների պաշտպանության ներքո»։

Ըստ հաղորդագրության՝ Maersk-ի ղեկավարության և զինվորականների հետ համաձայնության գալով՝ նավը դուրս է եկել Պարսից ծոցից ԱՄՆ զինվորականների ուղեկցությամբ։

«Maersk-ը շնորհակալություն է հայտնում ԱՄՆ զինվորականներին նրանց պրոֆեսիոնալիզմի և արդյունավետ համակարգման համար, որոնց շնորհիվ հնարավոր դարձավ այս գործողությունը, և ընկերությունը հույս ունի, որ Alliance Fairfax-ը կվերադառնա նորմալ առևտրային գործունեության», - ընդգծել է ընկերությունը։

Ավելի վաղ ԱՄՆ զինված ուժերի կենտրոնական հրամանատարությունը (CENTCOM) հաղորդել էր, որ մայիսի 4-ին երկու նավ է անցել նեղուցով։