Իրանն ԱՄՆ-ի կողմից նավթատար լցանավերի կալանումը որակել է «ծովահենության օրինականացում»

Թեհրանը դատապարտում է ԱՄՆ-ին Հնդկական օվկիանոսում ամերիկացի զինվորականների կողմից իրանական Majestic X և Tifani նավթատար լցանավերը կալանելու համար և դա համարում է «ծովահենության օրինականացում»։ «Արմենպրես»-ի փոխանցմամբ՝ այս մասին X-ում գրել է Իրանի արտաքին գործերի նախարարության պաշտոնական ներկայացուցիչ Էսմայիլ Բաղային։

«Սա ծովահենության և զինված կողոպուտի ուղղակի օրինականացում է բաց ծովում։ Ծովահենները վերադարձել են, միայն թե հիմա նրանք գործում են կառավարության կողմից տրված հրամաններով, ընթանում են պաշտոնական դրոշների ներքո և իրենց կողոպուտն անվանում են «իրավապահ գործունեություն», - նշել է Բաղային։

Խոսնակն ընդգծել է, որ ԱՄՆ-ն պետք է լիակատար պատասխանատվություն կրի իր «անօրինական վարքագծի» համար, որը «հարված է հասցնում միջազգային իրավունքի և միջազգային ազատ առևտրի հիմունքներին և սպառնում ծովում անվտանգության հիմնարար սկզբունքներին»։

Միևնույն ժամանակ, ըստ «Ինտերֆաքս» գործակալության, ՄԱԿ-ում Իրանի մշտական ​​ներկայացուցիչ Ամիր Սայիդ Իրավանին լրագրողների հետ զրույցում ասել է, որ «Միացյալ Նահանգները և Իսրայելն անօրինական ագրեսիվ պատերազմ են մղում Իրանի դեմ՝ խախտելով ՄԱԿ-ի կանոնադրությունը, խաթարելով անվտանգությունը ծովում և սպառնալով տարածաշրջանային խաղաղությանը»։

Անցյալ շաբաթ Հնդկական օվկիանոսում ԱՄՆ-ի Հնդկախաղաղօվկիանոսյան հրամանատարության (INDOPACOM) ուժերի կողմից կալանվել են ամերիկյան պատժամիջոցների ցանկում ներառված երկու նավթատար լցանավ՝ Majestic X-ը և Tifani-ն։

Այս նավերից յուրաքանչյուրը տեղափոխում էր մոտավորապես 1,9 միլիոն բարել իրանական նավթ, որն առգրավվել է դաշնային հրամանների հիման վրա, որոնք ԱՄՆ-ի դատարանների կողմից տրվել են Վաշինգտոնի միակողմանի պատժամիջոցների ռեժիմի շրջանակներում։