Վրաստանում ԵՄ դեսպանը կկանչվի երկրի ԱԳ նախարարություն

Վրաստանի արտաքին գործերի նախարար Մակա Բոչորիշվիլին հայտարարել է, որ երկրում ԵՄ դեսպան Պավել Գերչինսկին կկանչվի Վրաստանի ԱԳ նախարարություն՝ վերջին հայտարարությունների վերաբերյալ պարզաբանումներ տալու համար։

«Արմենպրես»-ի հաղորդմամբ՝ այս մասին հայտնում է Սպուտնիկ գործակալության վրացական ծառայությունը։

Գործակալության փոխանցմամբ՝ Բրյուսելում «Վրաստանը ուշադրության կենտրոնում» խորագրով լուսանկարչական ցուցահանդեսին մասնակցող Պավել Գերչինսկին հայտարարել է, որ երկիրը «սխալ ուղղությամբ է շարժվում»։ Նա հույս է հայտնել, որ Վրաստանը կվերադառնա եվրոպական ուղուն, այլ ոչ թե իր «մութ անցյալին»։

«Մենք հնարավորություն կունենանք հանդիպելու Պավել Գերչինսկու հետ Արտաքին գործերի նախարարությունում և քննարկելու հենց այն հարցերը, որոնք արդարացիորեն վրդովմունք են առաջացրել վրացական քաղաքական հասարակության մեջ»,-նշել է Բոչորիշվիլին՝ ընդգծելով, որ եվրոպական բյուրոկրատիայի նման հայտարարությունները մտահոգիչ են։

Վրաստանի ԱԳ նախարարը մտահոգիչ է համարել այն, որ վրաց ժողովրդի շահերն ու ընտրությունները անտեսվում են այն ժամանակ, երբ վրաց ժողովրդի շահերը այդքան հաճախ են շահարկվում։

«Եվ հիմա մենք նման շահարկումներ ենք լսում Բրյուսելից»,-ասել է Բոչորիշվիլին։

Ի պատասխան Վրաստանի իշխանությունների կողմից «Արտաքին ազդեցության թափանցիկության մասին» օրենքի և «Ընտանեկան արժեքների և անչափահասների պաշտպանության մասին» օրենքի ընդունման, որն արգելում է ԼԳԲՏ քարոզչությունը, Բրյուսելը 2024 թվականին վերանայել է Թբիլիսիի հետ իր հարաբերությունները՝ հրաժարվելով իշխող «Վրացական երազանք» կուսակցության ներկայացուցիչների հետ բարձր մակարդակի հանդիպումներից և կասեցնելով ֆինանսական օգնությունը։ Ըստ էության, երկրի եվրաինտեգրումը դադարեցվել է։

Վրաստանի վարչապետ Իրակլի Կոբախիձեն, իր հերթին, 2024 թվականի նոյեմբերի 28-ին հայտարարել է ԵՄ անդամակցության բանակցությունների մեկնարկը մինչև 2028 թվականը օրակարգից հանելու իր որոշման մասին։