ԱՄՆ-ն կպահպանի Հորմուզի նեղուցի նկատմամբ լիակատար վերահսկողությունը մինչև Իրանի հետ համաձայնագրի կնքումը. Թրամփ
2 րոպեի ընթերցում
ԱՄՆ նախագահ Դոնալդ Թրամփը հայտարարել է, որ ամերիկյան ուժերը լիովին վերահսկում են Հորմուզի նեղուցը, և այդպես կշարունակվի մինչև համաձայնագրի կնքումը: Նա նաև անդրադարձել է իրանական ղեկավարությանը՝ պնդելով, որ կոշտ գծի կողմնակիցների և չափավոր հայացքներ ունեցող գործիչների միջև պայքար է ընթանում: «Արմենպրես»-ի փոխանցմամբ՝ այս մասին նա գրել է Truth Social հարթակում:
«Մենք լիակատար վերահսկողություն ունենք Հորմուզի նեղուցի նկատմամբ։ Ոչ մի նավ չի կարող մտնել կամ դուրս գալ՝ առանց Միացյալ Նահանգների ռազմածովային ուժերի թույլտվության։ Այն «ամուր փակված է», մինչև այն պահը, երբ Իրանը կարողանա համաձայնագիր կնքել», - գրել է ԱՄՆ նախագահը։
Նա հավելել է, որ Իրանը «մեծ դժվարություններ ունի»՝ հասկանալու, թե «ով է իր առաջնորդը»։
«Նրանք պարզապես չգիտեն։ Պարզապես խելագարություն է ներքին պայքարը, որ ընթանում է մարտադաշտում մեծ պարտություն կրած «կոշտ գծի» կողմնակիցների և «չափավորների» միջև, որոնք այդքան էլ չափավոր չեն, բայց սկսում են հարգանք վայելել», - հավելել է ԱՄՆ նախագահը։
ԱՄՆ-ն ապրիլի 13-ից շրջափակել է իրանական նավահանգիստները: Նախագահ Թրամփը հայտարարել է Իրանի հետ ապրիլի 22-ին ավարտվող երկշաբաթյա հրադադարը երկարաձգելու մասին, մինչև Իրանը կներկայացնի իր առաջարկները, և քննարկումները կավարտվեն: Սպիտակ տան խոսնակը նշել է, որ Թրամփը դեռ հստակ վերջնաժամկետ չի սահմանել Իրանի առաջարկները ստանալու համար: