2 րոպեի ընթերցում
Իտալիայի արտաքին գործերի նախարար և փոխվարչապետ Անտոնիո Տայանին հայտնել է, որ իր իրանցի պաշտոնակից Աբբաս Արաղչիի հետ հեռախոսազրույցում քննարկել է Հորմուզի նեղուցում նավագնացության իրավիճակը։
«Արմենպրես»-ի փոխանցմամբ՝ X հարթակում Տայանին գրել է, որ Թեհրանին կոչ է արել կառուցողականորեն լուծել ճգնաժամը և վերականգնել դրական հարաբերությունները Պարսից ծոցի հարևան երկրների հետ։
«Չափազանց կարևոր է հնարավորինս շուտ հասնել հրադադարի շուրջ համաձայնության, որը կերաշխավորի Հորմուզի նեղուցով նավագնացության անվտանգ վերսկսումը և կհաստատի Իրանի միջուկային ծրագրի բացառապես քաղաքացիական բնույթը», - նշել է Տայանին։
Նա նաև ընդգծել է Լիբանանում հրադադարի պահպանման անհրաժեշտությունը՝ բոլոր կողմերին կոչ անելով կոնկրետ պարտավորություններ ստանձնել կայուն և ընդհանուր խաղաղություն հաստատման համար։
«Իտալիան պատրաստ է ակտիվորեն աջակցելու երկխոսությանը և կայունության ամրապնդմանը Լիբանանում և ամբողջ տարածաշրջանում», - եզրափակել է Իտալիայի ԱԳ նախարարը։
ԱՄՆ-ի և Իրանի միջև հաստատված երկշաբաթյա հրադադարի ժամկետի լրանալուց առաջ՝ ապրիլի 22-ի գիշերը ԱՄՆ նախագահ Դոնալդ Թրամփը հայտարարել է հրադադարը երկարաձգելու մասին՝ միևնույն ժամանակ շեշտելով, որ իրանական նավահանգիստների ծովային շրջափակումը կշարունակվի։ Իրանն իր հերթին փակ է պահում Հորմուզի նեղուցը՝ ի պատասխան ամերիկյան ծովային շրջափակման։