2 րոպեի ընթերցում
Շիրակի մարզում մեկնարկում է առողջապահական ենթակառուցվածքների արդիականացման հերթական խոշոր փուլը, որի շրջանակում հիմնանորոգվելու է Գյումրիի Ն.Ա. Մելիքյանի անվան թիվ 2 պոլիկլինիկան։ 24 հազար բնակչի սպասարկող հաստատությունը կառուցվել է դեռևս 1930-ական թվականներին և ընդգրկվել է ՀՀ կառավարության առողջապահական հաստատությունների արդիականացման ծրագրում։ Վերակառուցման նպատակով պետական բյուջեից հատկացվել է 1 մլրդ 450 մլն դրամ։ Նախագծային աշխատանքներն արդեն ավարտված են, կապալառու կազմակերպության մրցույթն անցկացվել է, և շինարարի հայտնի դառնալուց հետո առաջիկայում կտրվի աշխատանքների մեկնարկը։ Քանի որ նույն մասնաշենքում են գործում նաև Շտապօգնության Գյումրիի կայանն ու Արյան բանկը, պատասխանատուները դիտարկում են նախկին «Սամարիթեր» հիվանդանոցի տարածքը, որն այժմ վերանորոգվում է՝ տեղափոխվող բուժհաստատությունների համար պատշաճ պայմաններ ապահովելու նպատակով։
Ինչպես «Արմենպրես»-ին տեղեկացրին մարզպետի աշխատակազմից, այս աշխատանքները հանդիսանում են ՀՀ կառավարության 2021-2026 թվականների գործունեության միջոցառումների ծրագրի մաս։ Շիրակի մարզում առողջապահական ոլորտի բարեփոխումները շարունակական են. ներկայումս ընթացքի մեջ են Արթիկի բազմապրոֆիլ բժշկական կենտրոնի շինարարական աշխատանքները, ինչպես նաև նոր տիպային շենքեր են կառուցվում Ախուրիկի բժշկական ամբուլատորիայի և Պեմզաշենի առողջության կենտրոնի համար, որոնք նախատեսվում է շահագործման հանձնել արդեն այս տարվա ընթացքում։