Ոստիկանության 4 հենասյունային ուղղությունների ձևավորումը ֆանտաստիկայի ժանրից էր թվում. ՀՀ վարչապետ
1 րոպեի ընթերցում
Հայաստանի Ներքին գործերի նախարարությունում Ոստիկանության 108-րդ տարեդարձին նվիրված կոլեգիայի հանդիսավոր նիստին իր ելույթում խոսելով անկախացումից ի վեր ոստիկանության համակարգի կայացման փուլերի մասին՝ ՀՀ վարչապետ Նիկոլ Փաշինյանն ընդգծել է, որ դրանք շրջադարձային են եղել իրավակարգի և կարգուկանոնի պահպանման և ամրապնդման համար:
«Արմենպրես»-ի փոխանցմամբ՝ այս համատեքստում Նիկոլ Փաշինյանը կարևորել է ժամանակին համընթաց դինամիկ զարգացող ոստիկանական համակարգ ունենալը:
«Ըստ էության՝ մեր բարեփոխումներով մենք հենց այդ ճանապարհով ենք գնում, բայց երբ ոստիկանության ոլորտի բարեփոխումները սկսել էինք, այն ժամանակ դա ֆանտաստիկայի ոլորտից էր թվում, երբ մտածում էինք, որ պարեկային ոստիկանություն լինի՝ ամբողջությամբ վերազինված նոր տեխնիկայով, սարքավորումներով, մեքենաներով և այլն»,- նշել է Փաշինյանը։
ՀՀ վարչապետն ընդգծել է, որ բարեփոխումները շարունակական են լինելու, քանի որ կյանքն ու ընկալումներն անհամաչափորեն արագ են փոփոխվում և ամենօրյա աշխատանքն իր մեջ պետք է պարունակի բարեփոխման տարր: Նիկոլ Փաշինյանը նշել է, որ սա վերաբերում է և՛ տեխնիկային, և՛ օրենսդրությանը, և՛ համազգեստին, և՛ սպառազինությանը, և՛ կարգավորումներին: