Առնվազն մեկ իրանական նավ է դուրս եկել Արաբական ծով՝ շրջափակման հայտարարումից հետո. ՏԱՍՍ

Իրանի դրոշի ներքո նավարկող առնվազն մեկ նավ է դուրս եկել Օմանի ծոցից դեպի Արաբական ծով՝ ԱՄՆ-ի կողմից շրջափակման հայտարարումից հետո։ «Արմենպրես»-ի փոխանցմամբ՝ այս մասին հաղորդում է ՏԱՍՍ-ը, որը վերլուծել է ծովային տրանսպորտի տեղաշարժերին հետևող մոնիթորինգի համակարգերի տվյալները:

Shabdis նավը, որն Իրանի դրոշի ներքո դուրս է եկել Իրանի Չաբահար նավահանգստից, Երևանի ժամանակով ժամը 01:10-ի դրությամբ մտել է Արաբական ծով: Երևանի ժամանակով  ժամը 10:00-ի դրությամբ նավը գտնվել է Պակիստանի ափից մոտավորապես 200 կմ հարավ և շարժվելիս է եղել հարավ՝ դեպի Հնդկական օվկիանոս: Որոշ մոնիթորինգային համակարգերի տվյալներով՝ Shabdis նավը կարող է գտնվել ԱՄՆ պատժամիջոցների ներքո:

Ապրիլի 11-ին ԱՄՆ-ի և Իրանի միջև բանակցությունների ձախողումից հետո ԱՄՆ զինված ուժերի կենտրոնական հրամանատարությունը հաղորդել է, որ ապրիլի 13-ին սկսում է Իրանի ծովային շրջափակումը՝ արգելելով բոլոր նավերի անցումը, որոնք ուղևորվում են իրանական նավահանգիստներ, ինչպես նաև փորձում են հեռանալ այդ երկրի ափերից: