ՀՀ ՇՄ նախարարը Նորվեգիայի գործընկերոջ հետ քննարկել է շրջակա միջավայրի պահպանության ոլորտի առաջնահերթ խնդիրներ

Հայաստանի շրջակա միջավայրի նախարար Համբարձում Մաթևոսյանն Օսլոյում հանդիպել է Նորվեգիայի Թագավորության կլիմայի և շրջակա միջավայրի նախարար Անդրեաս Բյելանդ Էրիկսենի հետ։

Հանդիպման ընթացքում քննարկել են շրջակա միջավայրի պահպանության ոլորտի առաջնահերթ խնդիրներն ու դրանց լուծման հնարավորությունները՝ անդրադառնալով նաև Նորվեգիայի փորձին բնական աղետների, մասնավորապես՝ ջրհեղեղների կառավարման և կանխարգելման ուղղությամբ։

Ինչպես «Արմենպրես»-ը տեղեկանում է ՇՄ նախարարության տարածած հաղորդագրությունից,  կողմերն անդրադարձել են COP17 համաժողովի նախապատրաստական աշխատանքներին, ակնկալիքներին, ինչպես նաև անցած համաժողովների փորձին։ Կարևորել է առաջնորդների մակարդակում բարձրացվելիք առաջնահերթ հարցերի հստակեցումը՝ առավել արդյունավետ արդյունքներ ապահովելու նպատակով։

Քննարկել են Գլոբալ վերանայման գործընթացը և առաջնորդների գագաթնաժողովի դերը՝ COP17-ի օրակարգի ձևավորման համատեքստում։

Համբարձում Մաթևոսյանն ընդգծել է ներառականության կարևորությունը՝ ապահովելով բոլոր շահագրգիռ կողմերի, այդ թվում՝ խոցելի խմբերի, բնիկ ժողովուրդների, կանանց և երիտասարդների մասնակցությունը։

Հանդիպման ընթացքում անդրադարձել են նաև մեկանգամյա օգտագործման պլաստիկի սահմանափակման քաղաքականությանը, ինչպես նաև թվայնացման գործիքների կիրառմանը՝ խնդիրների բացահայտման և կառավարման արդյունավետությունը բարձրացնելու նպատակով։

Քննարկել են Փարիզյան համաձայնագրի 6.2 հոդվածի շրջանակում միջազգային ածխածնային շուկաների համագործակցության հնարավորությունները։ Նորվեգական կողմը ներկայացրել է Նորվեգիայի գլոբալ արտանետումների կրճատման նախաձեռնությունը (NOGER)՝ որպես կառավարություն-կառավարություն համագործակցության մեխանիզմ, որը միտված է հավելյալ արտանետումների կրճատմանը, կանաչ անցմանը և բարձր վստահելիությամբ միջազգային համագործակցության զարգացմանը։

Համբարձում Մաթևոսյանը ողջունել է Նորվեգիայի առաջնորդող դերակատարումը 6.2 հոդվածի շրջանակում և ընդգծել է Հայաստան–Նորվեգիա համագործակցության հնարավորությունների ուսումնասիրման կարևորությունը՝ մասնավորապես NOGER նախաձեռնության շրջանակում։ Նշել է, որ համագործակցությունը կարող է մեկնարկել տեխնիկական պատրաստվածության բարձրացման, ոլորտային վերլուծության և մեթոդաբանական աշխատանքների փուլից՝ հետագայում անցնելով փորձնական ծրագրերի իրականացման, հատկապես արդյունաբերության ոլորտում։

Ընդգծել է, որ նման համագործակցությունը կնպաստի Հայաստանի ազգային մակարդակով սահմանված գործողությունների (NDC 3.0) իրականացմանը, կուժեղացնի մեր երկրի ինստիտուցիոնալ կարողությունները 6-րդ հոդվածի շրջանակում մասնակցության համար և կբացի նոր հնարավորություններ կլիմայական ֆինանսավորման և ցածր ածխածնային ներդրումների ներգրավման համար։

Նորվեգական կողմը պատրաստակամություն է հայտնել աջակցել Հայաստանին միջազգային բանակցային գործընթացներում։

Կողմերն անդրադարձել են նաև Հայաստանի, Կոլումբիայի նախագահության և Կենսաբազմազանության մասին կոնվենցիայի քարտուղարության միջև համագործակցության զարգացման հեռանկարներին։