ԱՄՆ-Իրան բանակցությունները ձախողվել են. Թեհրանը հրաժարվել է կատարել ուրանի և Հորմուզի նեղուցի վերաբերյալ Վաշինգտոնի պահանջները

ԱՄՆ-ն չի կարողացել Պակիստանում կայացած բանակցությունների ընթացքում համաձայնության գալ Իրանի հետ պատերազմը դադարեցնելու վերաբերյալ։ «Արմենպրես»-ի հաղորդմամբ` այս մասին ապրիլի 12-ի գիշերը հայտարարել է ԱՄՆ փոխնախագահ Ջ.Դ. Վենսը։ 

«Կարծում եմ՝ սա շատ ավելի վատ լուր է Իրանի, քան Ամերիկայի Միացյալ Նահանգների համար», - ասել է Վենսը։ Նա հավելել է, որ ԱՄՆ-ն ներկայացրել է վերջնական առաջարկ, սակայն իրանցի բանակցողները հրաժարվել են ընդունել Վաշինգտոնի պայմանները։

Միացյալ Նահանգների ու Իրանի պատվիրակությունները լքել են Իսլամաբադը։

Իրանի արտաքին գործերի նախարարությունը, իր հերթին, հայտարարել է, որ կողմերը փոխըմբռնման են հասել մի շարք հարցերի շուրջ, սակայն համաձայնության չեն հասել «երկու կամ երեք կարևոր հարցերի» շուրջ։ Ըստ Tasnim գործակալության, ԱՄՆ-ն պահանջել է, որ հարստացված ուրանը հանվի Իրանից։ Financial Times-ը հայտնել է, որ կողմերը փակուղի են մտել Հորմուզի նեղուցի բացման հարցում։

Բանակցությունները տեղի են ունեցել ապրիլի 11-ին և ապրիլի 12-ի գիշերը։ Իրանցի պաշտոնյաները հայտարարել են, որ բանակցությունները տևել են գրեթե 25 ժամ։

Բանակցությունների ավարտից հետո ԱՄՆ կենտրոնական հրամանատարությունը հայտնել է, որ Ռազմածովային ուժերն ինքնաթիռներ են պատրաստում պատասխանատվության գոտու վրայով թռիչքների համար։

Ապրիլի 8-ի գիշերը ԱՄՆ-ն և Իրանը համաձայնության եկան երկշաբաթյա հրադադարի և Հորմուզի նեղուցի բացման շուրջ։ Axios-ը հաղորդում է, որ բանակցություններում փակուղու պատճառով հրադադարն այժմ վտանգված է։

Ապրիլի 11-ին, Իսլամաբադում բանակցությունների ֆոնին, ԱՄՆ զինված ուժերը սկսել են գործողություն Հորմուզի նեղուցը մաքրելու համար։ Այս մասին հայտարարել է ԱՄՆ նախագահ Դոնալդ Թրամփը։ Իսլամական հեղափոխության պահապանների կորպուսը (ԻՀՊԿ) ապրիլի 12-ին հայտարարել է, որ կկանխի ռազմանավերի` նեղուցով անցնելու ցանկացած փորձ։ ԻՀՊԿ-ն ընդգծել է, որ որոշակի պայմաններում նեղուցով անցնել թույլատրվում է միայն քաղաքացիական նավերին։ Այս հայտարարությունից դատելով՝ նավագնացությունն այժմ փակ է։