368.52
ՀՏԶՀ-ի պատվիրատվությամբ Հացիկում կառուցվում է նոր բուժամբուլատորիա
1 րոպեի ընթերցում
ՀՀ կառավարության միջոցներով և Հայաստանի տարածքային զարգացման հիմնադրամի (ՀՏԶՀ) պատվիրատվությամբ Շիրակի մարզի Ախուրյան խոշորացված համայնքի Հացիկ բնակավայրում ընթանում է նոր բուժամբուլատորիայի կառուցման շինարարությունը, որի իրականացման համար պետբյուջեից հատկացվել է շուրջ 142.5 միլիոն դրամ։
Նորակառույց կենտրոնը նախատեսված է ապահովելու բնակիչների համար հասանելի և ժամանակակից առաջնային բուժօգնություն։ Երկհարկանի կառույցում կգործի առողջության առաջնային պահպանման օղակը՝ հագեցած անհրաժեշտ գույքով և բժշկական տեխնիկայով։
Ախուրյան համայնքի ղեկավար Զավեն Մանուկյանի խոսքով՝ համայնքն իր հերթին իրականացրել է հողհատկացում, իսկ շինարարությունն ու անհրաժեշտ սարքավորումների տրամադրումն ամբողջությամբ կատարվում է պետական միջոցներով։
«Շատ եմ կարևորում հատկապես գյուղական բնակավայրերում ամբուլատորիաների առկայությունը»,-«Արմենպրես»-ի փոխանցմամբ՝ նշել է համայնքապետը՝ հավելելով, որ շինարարության ընթացքն ու տեմպերը գնահատվում են բավարար։ Շինարարի հավաստմամբ՝ շենքի շինարարությունը կավարտվի մոտ չորս ամսից։
Բաժանորդագրվեք մեր ալիքին Telegram-ում