Իսպանիան փակել է իր օդային տարածքն Իրանի դեմ պատերազմին մասնակցող ամերիկյան ինքնաթիռների համար

Իսպանիան փակել է իր օդային տարածքն Իրանի վրա հարձակումներին մասնակցող ամերիկյան ինքնաթիռների համար։

Ինչպես «Արմենպրես»-ը տեղեկանում է Reuters-ից, այս մասին Մադրիդում լրագրողների հետ զրույցում հայտարարել է Իսպանիայի պաշտպանության նախարար Մարգարիտա Ռոբլեսը։

«Մենք չենք թույլատրում ո՛չ ռազմական բազաների օգտագործումը, ո՛չ էլ օդային տարածքի օգտագործումն Իրանում պատերազմի հետ կապված գործողությունների համար»,- ասել է նա։

Իսպանական El Pais թերթը տեղեկացրել է, որ օդային տարածքի փակումը ռազմական ինքնաթիռներին ստիպում է շրջանցել ՆԱՏՕ-ի անդամ Իսպանիայի տարածքը Մերձավոր Արևելքում գտնվող իրենց թիրախներին հասնելու ճանապարհին, սակայն դա չի ներառում արտակարգ իրավիճակները։

«Այս որոշումն Իսպանիայի կառավարության կողմից արդեն կայացրած որոշման մասն է՝ չմասնակցել կամ չնպաստել միակողմանիորեն և միջազգային իրավունքին հակասող պատերազմին»,- Cadena Ser ռադիոկայանին տված հարցազրույցում ասել է Իսպանիայի էկոնոմիկայի նախարար Կառլոս Կուերպոն՝ հարցին, թե արդյոք Իսպանիայի օդային տարածքը փակելու որոշումը կարող է վատթարացնել հարաբերությունները Միացյալ Նահանգների հետ։

Իսպանիայի վարչապետ Պեդրո Սանչեսը եղել է ԱՄՆ-ի և Իսրայելի կողմից Իրանի վրա հարձակումների ամենաակտիվ ընդդիմացողներից մեկը՝ դրանք որակելով որպես անխոհեմ և անօրինական։

Ավելի վաղ ԱՄՆ նախագահ Դոնալդ Թրամփը սպառնացել է կրճատել առևտուրը Մադրիդի հետ՝ Իրանի դեմ պատերազմում Իսպանիայի ռազմաբազաների օգտագործումը մերժելու համար։