Դեսպան Գևորգյանը հանդիպել է նորաստեղծ Ուրուգվայ-Հայաստան բարեկամական խմբի անդամներին
1 րոպեի ընթերցում
Ուրուգվայում Հայաստանի Հանրապետության դեսպան Մարիամ Գևորգյանը երկրի խորհրդարանում հանդիպել է նորաստեղծ Ուրուգվայ-Հայաստան բարեկամական խմբի անդամների հետ:
«Արմենպրես»-ի հաղորդմամբ՝ այս մասին նշված է Ուրուգվայում ՀՀ դեսպանության տարածած հաղորդագրության մեջ։
«Ողջունելով խորհրդարանում Հայաստանի հետ բարեկամական խմբի ձևավորումը՝ ՀՀ դեսպանը վստահություն է հայտնել, որ այն նոր խթան կհանդիսանա միջխորհրդարանական շփումների և խորհրդարանական դիվանագիտության ակտիվացման համար»,-հայտնում է դեսպանությունը:
Նշվում է, որ հանդիպման շրջանակներում ՀՀ դեսպանը պատասխանել է ուրուգվայցի խորհրդարանականների՝ Հայաստանի շուրջ անվտանգային իրավիճակին, հարևան երկրների հետ հարաբերությունների կարգավորման գործընթացներին և հայ-ուրուգվայական երկկողմ հարաբերություններին առնչվող մի շարք հարցերի:
Հաղորդվում է, որ կողմերը փոխադարձաբար ընդգծել են երկկողմ հարաբերությունների բարձր մակարդակը և դրանց հետագա զարգացման ուղղությամբ ջանքեր գործադրելու պատրաստակամությունը: