Իրաքում անօդաչու թռչող սարքը հարվածել է ԱՄՆ դիվանագիտական հաստատությանը. Reuters
2 րոպեի ընթերցում
Անօդաչու թռչող սարքը մարտի 10-ին հարվածել է Իրաքում Միացյալ Նահանգների դիվանագիտական ներկայացուցչությանը։ Հարվածի հետևանքով տուժածներ չեն եղել, բոլորն անվտանգ են։ Ինչպես հաղորդում է «Արմենպրես»-ը, այս մասին հայտնում է Reuters-ը՝ հղում անելով իր աղբյուրներին։
Անօդաչուն հարվածել է Բաղդադի օդանավակայանի կողքին գտնվող Բաղդադի դիվանագիտական աջակցության կենտրոնին։ Հաստատությունում գտնվող անձանց հրամայվել է թաքնվել։
Սպիտակ տունը և Պետդեպարտամենտը անմիջապես չեն արձագանքել տեղեկությունը մեկնաբանելու խնդրանքին։
The Washington Post-ը առաջինն էր, որ հաղորդել էր միջադեպի մասին և հայտնել, որ Բաղդադի համալիրի ուղղությամբ ընդհանուր առմամբ վեց անօդաչու թռչող սարք է արձակվել, որից հինգը խփվել են։ Պարբերականը նշել էր, որ հարձակումը, ամենայն հավանականությամբ, իրականացրել է Իրաքի իսլամական դիմադրությունը, որը Իրանի կողմից աջակցություն ստացող զինված խումբ է։
Ըստ Washington Post-ի՝ Իրաքը դատապարտել է իրաքյան բազաների մոտ տեղի ունեցած հարձակումները, բայց չի նշել ԱՄՆ օբյեկտի վնասվելու մասին։
«(Իրաքի) պաշտպանության նախարարությունը ընդգծում է, որ չի մնա անտարբեր՝ իբրև դիտորդ։ Փոխարենը, այն վճռականորեն կդիմադրի և կհետապնդի… բոլոր ներգրավված կողմերին», - ասվում է նախարարության հայտարարության մեջ։