1 րոպեի ընթերցում
Ռուսաստանը և Ուկրաինան մարտի 5-ին գերիների փոխանակում են անցկացրել 200-ը 200-ի դիմաց ձևաչափով: «Արմենպրես»-ի փոխանցմամբ՝ այս մասին հայտարարել է ՌԴ պաշտպանության նախարարությունը։
«Վերադարձվել է ռուսաստանցի 200 զինծառայող։ Փոխարենը հանձնվել է Ուկրաինայի զինված ուժերի 200 ռազմագերի», - ասվում է նախարարության հաղորդագրության մեջ։
«Ներկայում ռուսաստանցի զինծառայողները գտնվում են Բելառուսի Հանրապետության տարածքում, որտեղ նրանք ստանում են անհրաժեշտ հոգեբանական և բժշկական օգնություն», - հավելել է գերատեսչությունը։
ՌԴ ՊՆ տվյալներով՝ ռուսաստանցի բոլոր զինծառայողները կտեղափոխվեն հայրենիք՝ Ռուսաստանի պաշտպանության նախարարության բուժհաստատություններում բուժում և վերականգնում անցնելու համար։
Նախարարությունում հավելել են, որ Արաբական Միացյալ Էմիրությունները և Միացյալ Նահանգները միջնորդական ջանքեր են ցուցաբերել ուկրաինական գերությունից ռուսաստանցի զինվորականների խմբի վերադարձի համար։
Փետրվարի սկզբին ևս ՌԴ-ն և Ուկրաինան ռազմագերիների փոխանակում են անցկացրել։ Այդ ժամանակ տեղի է ունեցել փոխանակում «157-ը 157-ի դիմաց» ձևաչափով։ Նաև վերադարձվել է Ռուսաստանի Կուրսկի մարզի երեք բնակիչ։