2 րոպեի ընթերցում
Ռեշտ-Աստարա երկաթուղային նախագծի գործնական իրականացումը՝ «Հյուսիս-Հարավ» միջազգային փոխադրամիջանցքի շրջանակում, կսկսվի 2026 թվականի ապրիլի 1-ին: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին լրագրողներին հայտնել է ՌԴ էներգետիկայի նախարար Սերգեյ Ցիվիլյովը՝ Ռուսաստանի և Իրանի առևտրատնտեսական համագործակցության միջկառավարական հանձնաժողովի նիստի շրջանակում:
Էներգետիկայի նախարարի խոսքով՝ կողմերին հաջողվել է կարգավորել բոլոր վիճելի հարցերը, որոնք խանգարում էին նախագծի գործարկմանը:
«Հյուսիս-Հարավ միջանցքը ոչ միայն էներգետիկ, այլև տրանսպորտային միջանցք է: Դրա հետ է կապված Ռեշտ-Աստարա երկաթուղային գծի կառուցումը: Մենք գործնականում մշակել ենք նախկինում առկա բոլոր հարցերը, ներառյալ հողերի գրանցումը և արտոնությունների ստացումը, - ասել է Ցիվիլյովը: - Մենք այսօր ասացինք, որ ապրիլի 1-ին Ռուսաստանում տրանսպորտային շաբաթվա ընթացքում կլինի վերջնական համաձայնություն այս նախագծի իրականացումը սկսելու վերաբերյալ»:
Նախարարը բարձր է գնահատել պրոֆիլային մասնագետների աշխատանքը, որոնք մասնակցել են շինարարության նախապատրաստմանը:
2023 թվականին Ռուսաստանը և Իրանը «Հյուսիս-Հարավ» նախագծի շրջանակում կնքել են համաձայնագիր՝ Իրանի և Ադրբեջանի միջև ճանապարհի Ռեշտ-Աստարա 160-կիլոմետրանոց հատվածի համատեղ կառուցման մասին, որը կապահովի միջանցիկ երթևեկություն դեպի Պարսից ծոցի նավահանգիստներ։ Նախագծի ընդհանուր արժեքը կազմում է 1,6 միլիարդ եվրո։ Մոսկվան և Թեհրանը համատեղ կֆինանսավորեն նախագծումը, կառուցումն, ինչպես նաև ապրանքների և ծառայությունների մատակարարումը: