ՊԵԿ-ը հարկ վճարողներին վերադարձրել է 409 մլրդ դրամ. 95.6 մլրդ դրամը՝ հիփոթեքային վարկերի մարման համար
1 րոպեի ընթերցում
Պետական եկամուտների կոմիտեն 2025 թվականի ընթացքում հարկ վճարողներին վերադարձրել է 409 մլրդ դրամ, ինչը շուրջ 4.2 տոկոսով ավելի է 2024 թվականին արձանագրված ցուցանիշից:
«Արմենպրես»-ի փոխանցմամբ՝ այս մասին մամուլի ասուլիսի ընթացքում հայտարարեց ՊԵԿ նախագահ Էդուարդ Հակոբյանը:
«Այստեղ առանձնահատուկ աչքի է ընկնում հիփոթեքի գծով եկամտահարկի վերադարձը, որը հասել է բավականին բարձր ցուցանիշի՝ 95.6 մլրդ դրամի, 2024 թվականի նկատմամբ աճը 39.4 տոկոս է»,- ասաց Հակոբյանը:
ՊԵԿ նախագահը նշեց՝ նախորդ տարվա ընթացքում եկամուտ ապահոված աշխատատեղերի քանակը եղել է 823 հազար, որը 5.7 տոկոսով ավելի է 2024 թվականի ցուցանիշից, իսկ միջին եկամուտը կազմել է 401 հազար 400 դրամ, որը 6 տոկոսով ավելի է 2024 թվականի արդյունքից: