368.59
Արաբական և իսլամական 8 երկրներ դատապարտել են Արևմտյան ափի նկատմամբ Իսրայելի «էքսպանսիոնիստական քաղաքականությունը»
3 րոպեի ընթերցում
Արաբական և իսլամական 8 պետություններ համատեղ հայտարարությամբ դատապարտել են Իսրայելի որոշումները, որոնք ուղղված են օկուպացված Արևմտյան ափի նկատմամբ «իր ինքնիշխանությունը պարտադրելուն և այնտեղ էքսպանսիոնիստական քաղաքականության ընդլայնմանը»։ «Արմենպրես»-ի փոխանցմամբ՝ այս մասին հաղորդում է Al Jazeera-ն։
Հայտարարությունը հրապարակվել է ութ երկրների՝ Կատարի, Սաուդյան Արաբիայի, Եգիպտոսի, Հորդանանի, Արաբական Միացյալ Էմիրությունների, Ինդոնեզիայի, Պակիստանի և Թուրքիայի արտաքին գործերի նախարարների կողմից։
Նախարարները զգուշացրել են, որ շարունակվում է Արևմտյան ափին Իսրայելի կառավարության «անօրինական էքսպանսիոնիստական քաղաքականությունը»՝ վերահաստատելով, որ Իսրայելն ինքնիշխանություն չունի օկուպացված պաղեստինյան տարածքի նկատմամբ։
Հայտարարության մեջ նշվել է, որ օկուպացված Արևմտյան ափին Իսրայելի անօրինական միջոցառումները տարածաշրջանում բռնություն և հակամարտություն են հրահրում։
Նախարարները կտրականապես մերժել են անօրինական միջոցառումները՝ դրանք որակելով որպես միջազգային իրավունքի կոպիտ խախտում, որը խաթարում է երկու պետությունների բանաձևով կարգավորումը և պաղեստինյան ժողովրդի անքակտելի իրավունքը՝ ստեղծելու իր անկախ և ինքնիշխան պետությունը 1967 թվականի հունիսի 4-ի սահմաններով։
Նախարարները կոչ են արել միջազգային հանրությանը կատարել իրենց իրավական և բարոյական պարտականությունները և ստիպել Իսրայելին դադարեցնել օկուպացված Արևմտյան ափում վտանգավոր սրացումը և նրա պաշտոնյաների կողմից արված սադրիչ հայտարարությունները։
Asharq լրատվականի փոխանցմամբ՝ ավելի վաղ Իսրայելի անվտանգության կաբինետը հաստատել է մի շարք որոշումներ, որոնք ուղղված են օկուպացված Արևմտյան ափի իրավական և քաղաքացիական կարգավիճակի փոփոխմանը և տարածքում Իսրայելի վերահսկողության խորացմանը:
Համաձայն տեղեկությունների՝ «ամենանշանավոր որոշումներից է Հորդանանի օրենքի չեղարկումը, որն արգելում էր հողերի վաճառքը հրեաներին»։
Իսրայելական Ynet և Haaretz լրատվական կայքերը մեջբերել են Իսրայելի ֆինանսների նախարար Բեզալել Սմոտրիչի և պաշտպանության նախարար Իսրայել Կացի խոսքերը, որոնք ասել են, որ «որոշումները ներառում են տասնամյակների վաղեմության կանոնակարգերի չեղարկումը, որոնք խանգարում էին հրեաներին հող գնել Արևմտյան ափում»:
Բաժանորդագրվեք մեր ալիքին Telegram-ում