2 րոպեի ընթերցում
Իսպանիայի վարչապետ Պեդրո Սանչեսը հայտարարել է, որ Մադրիդը չի մասնակցի ԱՄՆ նախագահ Դոնալդ Թրամփի նախաձեռնությամբ ստեղծված Խաղաղության խորհրդին: «Արմենպրես»-ի փոխանցմամբ՝ այս մասին ասվում է թագավորության կառավարության տարածած մամուլի տեղեկագրում։
«Խոսելով Խաղաղության խորհրդի մասին՝ կառավարության ղեկավարը հայտնել է այս նախաձեռնությանը չմասնակցելու վերաբերյալ Իսպանիայի իշխանությունների որոշման մասին։ Ինչպես պարզաբանել է նա, այս որոշումը թելադրված է բազմակողմանի աշխարհակարգին, միջազգային իրավունքին և ՄԱԿ-ի համակարգին աջակցելու հարցում Իսպանիայի հետևողական դիրքորոշմամբ», - ասվում է հաղորդագրության մեջ։
Իսպանիայի կառավարության ղեկավարը նշել է, որ Պաղեստինի ապագան պետք է որոշեն պաղեստինցիներն իրենք, իսկ Իսրայելի հետ նրա խաղաղ և անվտանգ համակեցության հարցերը պետք է լուծվեն կողմերի միջև երկխոսությամբ։ Նրա խոսքով՝ կարգավորման միակ կայուն ճանապարհը մնում է երկու պետություն ստեղծելու վերաբերյալ որոշման իրականացումը։
Ի սկզբանե Խաղաղության խորհուրդը պետք է զբաղվեր Գազայի հատվածում հակամարտությունից հետո անկլավի կառավարմամբ, սակայն ԱՄՆ-ն ցանկանում է, որ խորհուրդն օգնի նաև աշխարհի այլ հակամարտությունների լուծմանը։
Խորհրդի անդամներն ընտրվում են երեք տարի ժամկետով, իսկ այն անդամները, որոնք կանոնադրության ուժի մեջ մտնելուց հետո առաջին տարվա ընթացքում Խաղաղության խորհրդին կհատկացնեն ավելի քան 1 միլիարդ ԱՄՆ դոլար, կունենան մշտական անդամակցության իրավունք։
ԱՄՆ նախագահի վարչակազմը Խաղաղության խորհրդի աշխատանքին մասնակցելու հրավերներ է ուղարկել ավելի քան 50 պետության ղեկավարների, այդ թվում՝ ՀՀ վարչապետ Նիկոլ Փաշինյանին, որը հունվարի 22-ին Դավոսում մասնակցել է խորհրդի կանոնադրության ստորագրման արարողությանը։
Հունվարի 21-ին ԱՄՆ նախագահի հատուկ բանագնաց Սթիվ Ուիթքոֆը հայտարարել է, որ Վաշինգտոնը ստացել է 20-25 երկրների համաձայնությունը՝ խորհրդի աշխատանքին մասնակցելու համար։