2 րոպեի ընթերցում
Հայտարարված այլընտրանքային միջանցքը բեռների համար սպառնալիք չի ստեղծի Վրաստանի տարանցիկ կարողության համար: Ինչպես «Արմենպրես»-ը տեղեկանում է Sputnik գործակալության վրացական ծառայությունից, այս մասին հայտարարել է Վրաստանի վարչապետ Իրակլի Կոբախիձեն։
Հայաստանի և Ադրբեջանի նախագահներ Վահագն Խաչատուրյանը և Իլհամ Ալիևը Դավոսում հայտարարել են, որ Վրաստանի տարածքով ներկայում փոխադրվող բեռներն ապագայում կփոխադրվեն անմիջապես Հայաստանի և Ադրբեջանի սահմանով։
«Ցանկանում եմ նշել մի պարզ ցուցանիշ, ինչը հաստատում է, որ այլընտրանքային միջանցքը սպառնալիք չի ստեղծի Վրաստանի համար. վերջին հինգ տարվա ընթացքում Միջին միջանցքում բեռների ծավալն ավելացել է յոթ անգամ։ Այս պայմաններում մեր միակ խնդիրն է առավելագույնս օգտագործել մեր ենթակառուցվածքներն այս աճող բեռնաշրջանառությունն իրականացնելու համար։ Նման աճի պայմաններում այլընտրանքային միջանցքը պարզապես կլրացնի մեր տարանցիկ գործառույթը», - ասել է Կոբախիձեն։
Միևնույն ժամանակ նա ընդգծել է, որ Վրաստանը ողջունում է Հայաստանի և Ադրբեջանի միջև հարաբերությունների վերականգնումը, այդ թվում՝ առևտրատնտեսական հարաբերությունների զարգացումը։
Դրա հետ մեկտեղ վարչապետը նշել է, որ Վրաստանը մեծ ներդրումներ է կատարում միջանցքի զարգացման գործում։
«Ինչ վերաբերում է մեր տարանցիկ գործառույթին, ապա մենք շատ մեծ ներդրումներ ենք կատարում տարանցիկ գործառույթի զարգացման գործում. դա վերաբերում է ճանապարհային ենթակառուցվածքներին, նավահանգիստներին, օդանավակայաններին և տարբեր տեսակի ենթակառուցվածքային օբյեկտներին: Սա հիմնված է դրական սպասումների վրա՝ կապված տարանցման մշտական աճի հետ», - հայտարարել է Կոբախիձեն։
Վրաստանով տարանցումը հատուկ դեր է խաղում երկրի տնտեսական զարգացման գործում՝ հաշվի առնելով Չինաստանի, Թուրքիայի և ԵՄ-ի հետ ազատ առևտրի գործող համաձայնագրերը: Դրա լրացուցիչ ամրապնդման համար ներկայում իրագործվում է Արևելք-Արևմուտք ճանապարհի մի հատվածի կառուցման մասշտաբային նախագիծը, որը Վրաստանի միջոցով կապում է Ասիան և Եվրոպան, ինչպես նաև Ռուսաստան տանող Հյուսիս-Հարավ ճանապարհը։