2 րոպեի ընթերցում
ԱՄՆ նախագահ Դոնալդ Թրամփն Իրանին սպառնացել է պատժել, եթե այնտեղից փորձեն սպանել իրեն։ «Արմենպրես»-ի փոխանցմամբ՝ NewsNation-ին տված հարցազրույցում Թրամփը հայտարարել է, որ այս դեպքում ինքը «շատ հստակ հրահանգներ է տվել... ջնջել նրանց Երկրի երեսից»։
«Նրանք չպետք է նման բան անեն, բայց ես գրություն եմ թողել, որ եթե երբևիցե ինչ-որ բան պատահի, նրանց ամբողջ երկիրը կպայթեցվի.... Ես շատ հստակ հրահանգներ ունեմ՝ եթե ինչ-որ բան պատահի, նրանց կջնջեն Երկրի երեսից», - ասել է ամերիկացի առաջնորդը։
Ավելի վաղ Իրանի զինված ուժերի գլխավոր շտաբի ներկայացուցիչ գեներալ Աբոլֆազլ Շեքարչին հայտարարել էր, որ Թեհրանում մեծ նշանակություն չեն տալիս Թրամփի սպառնալիքներին, իսկ Իրանի ղեկավարության դեմ ԱՄՆ-ի ցանկացած ռազմական գործողություն անպատասխան չի մնա։
Press TV-ի փոխանցմամբ՝ Շեքարչին նախազգուշացրել է «ջախջախիչ պատասխան միջոցների» մասին՝ ԱՄՆ-ի կողմից Իրանի ղեկավարության նկատմամբ ցանկացած ռազմական գործողության դեպքում։
Հունվարի 18-ին Թրամփը POLITICO-ին տված հարցազրույցում հայտարարել էր, որ «եկել է Իրանում նոր ղեկավարություն փնտրելու ժամանակը»։
Ավելի վաղ Թրամփը զգուշացրել էր Իրանի դեմ կոշտ միջոցների մասին՝ երկրում լայնածավալ անկարգությունների ճնշմանն ի պատասխան։ Սակայն անցյալ շաբաթ ԱՄՆ նախագահը հայտարարեց, որ իր տեղեկատվությամբ՝ Իրանի իշխանություններն այլևս պլաններ չունեն մահապատիժ իրականացնել բողոքի ցույցերին մասնակցած մարդկանց նկատմամբ։
Իրանում դեկտեմբերի 28-ից բողոքի ակցիաներ էին սկսվել իրանական ռիալի փոխարժեքի կտրուկ նվազման և բարձր գնաճի դեմ։ Հունվարի 8-ից, ըստ Իրանի արտաքին գործերի նախարար Աբբաս Արաղչիի հայտարարության, ցուցարարների շարքում հայտնվել են զինված ահաբեկիչներ։ Երկու շաբաթից ավելի տևած հակակառավարական ցույցերի ընթացքում մի քանի հազար մարդ է զոհվել, այդ թվում՝ իրավապահներ։