1 րոպեի ընթերցում
Հայաստանի աշխատանքի և սոցիալական հարցերի նախարար Արսեն Թորոսյանն ահազանգում է սոցիալական ցանցերում հերթական խարդախության տարածման մասին՝ քաղաքացիներին կոչ անելով զգոն լինել ու չտրվել խարդախությանն ու դրամաշորթությանը։
«Արմենպրես»-ի փոխանցմամբ՝ Արսեն Թորոսյանը թեմային անդրադարձել է «Ֆեյսբուք»-ի իր էջում հրապարակած տեսանյութում։
Թորոսյանը մանրամասնել է, որ սոցիալական ցանցերում և հատկապես «Տիկտոկ»-ում տարածվում է կեղծ լուր, թե իբր Հայաստանի այն քաղաքացիները, որոնք ծնվել են 1949 թվականից մինչև 2015 թվականը, սոցիալական ֆոնդից ստանալու են 350 հազար դրամ։ Տարածվող կեղծ տեսանյութում նշվում է, որ գումարը ստանալու համար անհրաժեշտ է դիմել մինչև հունվարի 15-ը։
«Այդ պրոֆիլում «Տելեգրամ»-ի ալիքի հղում է դրված, որը բացելուց հետո ձեզանից սկսելու են անձնական տվյալներ ուզել՝ ընդհուպ մինչև բանկային և քարտային տվյալներ՝ ասելով, որ գումարը փոխանցելու են այդ հաշվին, բայց սրա ամբողջ իմաստը ձեր բանկային հաշիվներից և քարտերից դրամ շորթելն է։ Եվ սա, ըստ էության, խարդախության և դրամաշորթության դասական օրինակ է, որին խնդրում եմ չտրվել։ Անտեսեք այդ տեսանյութը»,- ասել է Արսեն Թորոսյանը։