2 րոպեի ընթերցում
Չինաստանը վճռականորեն դեմ է Իսրայելի կողմից Սոմալիլենդի պաշտոնական ճանաչմանը՝ որպես «անկախ ինքնիշխան պետություն», ինչպես նաև Իսրայելի կողմից Սոմալիլենդի հետ «դիվանագիտական հարաբերություններ հաստատելու» համաձայնագրի ստորագրմանը։ Ինչպես հաղորդում է «Արմենպրես»-ը՝ վկայակոչելով Xinhua լրատվական գործակալությունը, այս մասին դեկտեմբերի 29-ին հայտարարել է Չինաստանի արտաքին գործերի նախարարության խոսնակ Լին Ցզյանը։
Լին Ցզյանը նշել է, որ Չինաստանը վճռականորեն աջակցում է Սոմալիի ինքնիշխանությանը, միասնությանը և տարածքային ամբողջականությանը և դեմ է ցանկացած քայլի, որը խաթարում է այդ երկրի տարածքային ամբողջականությունը։
«Ոչ մի երկիր չպետք է խրախուսի կամ աջակցի այլ երկրների ներքին անջատողական ուժերին իր սեփական եսասիրական շահերից ելնելով», - ճեպազրույցում ասել է ԱԳՆ խոսնակը՝ կոչ անելով Սոմալիլենդի ներկայացուցիչներին դադարեցնել «անջատողական գործունեությունը և արտաքին ուժերի հետ համագործակցությունը»։
Իսրայելը դեկտեմբերի 26-ին դարձավ առաջին երկիրը, որը պաշտոնապես ճանաչեց ինքնահռչակված Սոմալիլենդի Հանրապետությունը՝ որպես անկախ և ինքնիշխան պետություն՝ ցանկություն հայտնելով Սոմալիլենդի հետ անհապաղ համագործակցություն հաստատել գյուղատնտեսության, առողջապահության, տեխնոլոգիաների և տնտեսության ոլորտներում։