Թրամփի հաջորդ հանդիպումն ուկրաինական պատվիրակության հետ կկայանա հունվարին. Զելենսկի
2 րոպեի ընթերցում
Նախագահ Դոնալդ Թրամփի հանդիպումն ուկրաինական պատվիրակության և եվրոպացի ղեկավարների հետ պլանավորված է հունվարին: Ինչպես հաղորդում է «Արմենպրես»-ը, այս մասին հայտարարել է Վոլոդիմիր Զելենսկին ԱՄՆ նախագահ Դոնալդ Թրամփի հետ բանակցությունների արդյունքներին նվիրված մամուլի ասուլիսում:
«Մենք համաձայնվեցինք, որ մեր խմբերը կհանդիպեն առաջիկա շաբաթներին՝ քննարկված բոլոր հարցերն ավարտին հասցնելու համար: Մենք նախագահ Թրամփի հետ պայմանավորվեցինք, որ նա, հնարավոր է, Վաշինգտոնում կընդունի եվրոպացի ղեկավարներին և ուկրաինական պատվիրակությանը հունվարին», - ասել է Զելենսկին:
Միացյալ Նահանգների նախագահ Դոնալդ Թրամփը դեկտեմբերի 28-ին ԱՄՆ Ֆլորիդա նահանգի Փալմ Բիչում իր Մար-ա-Լագո հանգստավայրում ընդունել է Ուկրաինայի նախագահ Վոլոդիմիր Զելենսկիին։ Ավելի քան երեք ժամ տևած բանակցություններից հետո կողմերը հայտարարել են, որ ուկրաինական պատերազմի դադարեցման գործընթացը բարդ է և անհրաժեշտ կլինի առաջիկայում նոր հանդիպում անցկացնել։Այդուհանդերձ, Թրամփը նշել է, որ իրենք ավելի քան երբևէ մոտ են խաղաղությանը։
ԱՄՆ և Ուկրաինայի նախագահները նաև հեռախոսազրույց են ունեցել եվրոպական առաջնորդների հետ, ինչից հետո Թրամփը հայտնել է, որ բանակցությունները շարունակելու նպատակով առաջիկա շաբաթների ընթացքում կհանդիպեն ամերիկյան, ուկրաինական և եվրոպական պատվիրակությունները։ Թրամփի խոսքով՝ հանդիպումն ամենայն հավանականությամբ տեղի կունենա Վաշինգտոնում։