1 րոպեի ընթերցում
Միացյալ Նահանգները պլանավորում է յուրացնել ինչպես միջազգային ջրերում գրավված վենեսուելական լցանավերը, այնպես էլ դրանցով տեղափոխվող նավթահումքը։ «Արմենպրես»-ի փոխանցմամբ՝ այս մասին հայտարարել է ԱՄՆ նախագահ Դոնալդ Թրամփը Ֆլորիդայի Փալմ Բիչ քաղաքում լրագրողների հետ զրույցում:
«Մենք այն կպահենք մեզ: Գուցե, մենք այն վաճառենք, գուցե, պահենք, գուցե օգտագործենք ռազմավարական պաշարների (համալրման) համար: Մենք նաև կպահենք նավերը», - նրա խոսքերն է մեջբերում CNBC-ն։
Թրամփը հրահանգել է շրջափակել պատժամիջոցների տակ գտնվող լցանավերը, որոնք մտնում են Վենեսուելա կամ դուրս գալիս այնտեղից։ Դեկտեմբերի 10-ին ԱՄՆ-ն կալանել է խոշոր լցանավ, որը տեղափոխում էր ավելի քան 1 միլիոն բարել նավթ։ Անցած հանգստյան օրերին ԱՄՆ-ն կալանել է ևս մեկ նավ։ Դեկտեմբերի 22-ին Թրամփը հաստատել էր, որ ԱՄՆ-ն հետապնդում է երրորդ լցանավը։ Ըստ տարբեր տեղեկությունների՝ այն նույնպես կալանվել է։
Թրամփին նաև հարց են ուղղել՝ արդյոք նրա վերջնական նպատակն է պաշտոնից հեռացնել Վենեսուելայի նախագահ Նիկոլաս Մադուրոյին։ Նա նշել է, որ հրաժարական տալը Մադուրոյի կողմից «խելամիտ» քայլ կլինի։