Գերմանիայի կանցլերն աջակցություն է հայտնել Գազայի վերաբերյալ ԱՄՆ նախագահի ծրագրին

Գերմանիայի կանցլեր Ֆրիդրիխ Մերցը Իսրայել նախատեսված այցից առաջ հեռախոսազրույց է ունեցել Պաղեստինի նախագահ Մահմուդ Աբբասի հետ։ Նրանք քննարկել են Մերձավոր Արևելքում խաղաղ կարգավորման հեռանկարները։ 

Ինչպես հաղորդում է «Արմենպրես»-ը, Գերմանիայի կառավարության խոսնակ Ստեֆան Կոռնելիուսը լրագրողներին ասել է, որ զրույցը տեղի է ունեցել բարեկամական մթնոլորտում։ 

«Կանցլերն իր աջակցությունն է հայտնել ԱՄՆ նախագահ Դոնալդ Թրամփի խաղաղության ծրագրին և ողջունել է Պաղեստինի ազգային ինքնավարության կառուցողական դիրքորոշումն այդ հարցում», - նշել է նա։ 

Ըստ Մերցի՝  Պաղեստինը պետք է անհապաղ սկսի անհրաժեշտ բարեփոխումներ իրականացնել։ Կանցլերը կարծում է՝ եթե բարեփոխումները հաջողությամբ պսակվեն, Պաղեստինի ինքնավարությունը կկարողանա կառուցողական դեր խաղալ պատերազմից հետո ստեղծված կարգում։