Պուտինն անդրադարձել է Ռուսաստանի և Հնդկաստանի էներգետիկ ու տեխնոլոգիական համագործակցությանը
2 րոպեի ընթերցում
Ռուսաստանը և Հնդկաստանը ունեն համագործակցության շատ հետաքրքիր և ապագային միտված ուղղություններ, այդ թվում՝ արհեստական ինտելեկտի ոլորտում։ «Արմենպրես»-ի հաղորդմամբ՝ Մոսկվայում India Today հեռուստաընկերությանը տված հարցազրույցում այս մասին ասել է Ռուսաստանի նախագահ Վլադիմիր Պուտինը։
«Էներգետիկ համագործակցությունը մնում է կայուն և անշեղ, անկախ աշխարհաքաղաքական պայմաններից, ինչպես նաև Ուկրաինայում տեղի ունեցող իրադարձություններից»,- ասել է Պուտինը։
Նրա խոսքով՝ ռուսական նավթի և նավթամթերքի առևտուրը Հնդկաստանի հետ ամբողջությամբ ինտենսիվ են, իսկ ռուսական նավթային ընկերությունները հնդիկ գործընկերներին համարում են հուսալի։
Նրա խոսքով՝ «Ռոսատոմը» ներկայումս արտերկրում շահագործվող ԱԷԿ-ների համար ունի աշխարհում ամենաշատ միջուկային ռեակտորները, և այս ոլորտում համագործակցությունը Հնդկաստանի հետ կայուն է։
«Ռուսաստան–Հնդկաստան հարաբերությունները չեն վնասում երրորդ երկրներին, և կառուցված են փոխադարձ շահերի և երկարաժամկետ գործընկերության վրա»,- եզրափակել է ՌԴ նախագահը։
Ավելի վաղ, Հնդկաստանի վարչապետ Նարենդրա Մոդին X սոցիալական հարթակում գրառում էր հրապարակել՝ Պուտինին ողջունելով Դելի ժամանելու կապակցությամբ․
«Ուրախ եմ Դելիում ողջունել իմ ընկերոջը՝ նախագահ Պուտինին։ Անհամբեր սպասում ենք մեր հանդիպումներին այսօր երեկոյան և վաղը։ Հնդկաստանի և Ռուսաստանի միջև բարեկամությունը ժամանակով փորձված է, այն հսկայական օգուտ է բերել մեր ժողովուրդներին»։