Պապիկյանը պարզաբանեց զինծառայության ժամկետը հունվարից կրճատելու պատճառը

ՀՀ պաշտպանության նախարար Սուրեն Պապիկյանը պարզաբանեց, թե ինչու են որոշել պարտադիր զինծառայության ժամկետը 24 ամսվա փոխարեն 18 ամիս դարձնելու նախագիծը տարածել 2026թ հունվարի 1-ից հետո պարտադիր զինվորական ծառայության զորակոչվող քաղաքացիների վրա:

«Արմենպրես»-ի հաղորդմամբ՝ Պապիկյանը թեմային անդրադարձավ ԱԺ-ում լրագրողների հետ զրույցում: 

Նա չհամաձայնեց հնչած այն տեսակետի հետ, թե ի սկզբանե շրջանառված նախագծով ուժի մեջ մտնելու ժամկետը հունիսի փոխարեն հունվար սահմանելը նախընտրական քարոզարշավի շրջանակում է արվում: 

«Մեր հանրության արձագանքներն ենք հաշվի առել: Եթե հունիսին դա տեղի ունենար, ապա հունվարի 1-ից հետո բանակ գնացողների նկատմամբ կլիներ անարդար, որ կար հնարավորությունը, հաշվարկները մեզ թույլ էին տալիս դա անել ավելի վաղ»,-ասաց նախարարը:

Նախագիծը շրջանառելուց հետո, երբ այն տեղադրվել է e-draft հարթակում, երբ մարդիկ կարծիքներ են հայտնել, կառավարության համար ակնհայտ է դարձել՝ ավելի ճիշտ կլինի դա անել հունվարի 1-ից:

Ազգային ժողովի պաշտպանության և անվտանգության հարցերի մշտական հանձնաժողովը նոյեմբերի 24-ին հավանություն տվեց պարտադիր զինվորական ծառայության ժամկետը 6 ամսով կրճատելու վերաբերյալ՝ ՀՀ կառավարության ներկայացրած օրենքի նախագծին: Նախատեսվում է շարքային կազմի պարտադիր զինվորական ծառայության 24-ամսյա ժամկետը փոխարինել 18-ամսյա ծառայության ժամկետով՝ դրա գործողությունը տարածելով 2026թ հունվարի 1-ից հետո պարտադիր զինվորական ծառայության զորակոչվող քաղաքացիների վրա: