Դոնի Ռոստովի քաղաքապետը հարգանքի տուրք է մատուցել Հայոց ցեղասպանության զոհերի հիշատակին

Քաղաքապետ Տիգրան Ավինյանի հրավերով Երևանում գտնվող Դոնի Ռոստովի քաղաքապետ Ալեքսանդր Սկրյաբինն այցելել է Ծիծեռնակաբերդի հուշահամալիր, ծաղկեպսակ դրել և ծաղիկներ խոնարհել անմար կրակի մոտ: «Արմենպրես»-ի հաղորդմամբ՝ այս մասին հայտնել է Երևանի քաղաքապետարանը։

Դոնի Ռոստովի քաղաքապետի գլխավորած պատվիրակությունը շրջել է նաև Հայոց ցեղասպանության թանգարանում, ծանոթացել մշտական և ժամանակավոր ցուցադրություններին, որից հետո քաղաքապետ Ալեքսանդր Սկրյաբինը գրառում է կատարել պատվավոր հյուրերի հուշամատյանում:

Երևան այցի շրջանակում Դոնի Ռոստովի քաղաքապետի գլխավորած պատվիրակությունն այցելել է նաև «Երևան քաղաքի կառավարման տեխնոլոգիաների կենտրոն» ՓԲԸ ծանոթացել կենտրոնի գործունեությանն ու Երևանում ներդրված ժամանակակից թվային գործիքներին: