Գյումրի-Կարս երկաթուղու բացումը կարող է դառնալ Եվրոպա–Կենտրոնական Ասիա կապուղու կարևոր օղակ. Միրզոյան
1 րոպեի ընթերցում
Տարածաշրջանային ենթակառուցվածքների ապաշրջափակումը, այդ թվում՝ Հայաստանի տարածքով «Թրամփի ուղու» իրականացումը, կարող է ապահովել փոխշահավետ տնտեսական հնարավորություններ բոլոր երկրների համար։
«Արմենպրես»-ի հաղորդմամբ՝ այս մասին հայտարարել է արտաքին գործերի նախարար Արարատ Միրզոյանը։
«Այս ապաշրջափակումն անխոչընդոտ հաղորդակցություն կստեղծի Հարավային Կովկասի բոլոր երկրների և հարևան տարածաշրջանների միջև, այդ թվում՝ օրինակ Վրաստանին կապահովի Պարսից ծոցի հետ երկաթուղային կապով: Հայաստան-Թուրքիա սահմանին Գյումրի-Կարս երկաթուղու բացումը, բնականաբար, ևս կարող է էական նշանակություն ունենալ այս առումով՝ վրացական երկաթուղիների հետ դառնալով Եվրոպա-Կենտրոնական Ասիա կապուղիների շղթայի կարևոր մաս: Սա է Հայաստանի տեսլականը և գործնական քայլերի հիմքը»,- ասել է Միրզոյանը։
Հայաստան-Թուրքիա կարգավորման գործընթացում երկու երկրների հատուկ ներկայացուցիչներ Ռուբեն Ռուբինյանն ու Սերդար Քըլըչը սեպտեմբերի 12-ին Երևանում կայացած հանդիպման ժամանակ պայմանավորվել են գործնական քայլեր ձեռնարկել Գյումրի-Կարս երկաթուղին գործարկելու ուղղությամբ։