2 րոպեի ընթերցում
Հայաստանի Հանրապետության որևէ ինստիտուտ սահմանափակում չի ունենալու իր տարածքում «Թրամփի ուղի հանուն միջազգային խաղաղության և բարգավաճման» («Trump Route for International Peace and Prosperity» (TRIPP)) նախագծի մաս կազմող որևէ ենթակառուցվածքի տարածքի նկատմամբ:
«Արմենպրես»-ի փոխանցմամբ՝ այս մասին «Խաղաղության խաչմերուկ. զարգացնելով տարածաշրջանային հաղորդակցությունները և համագործակցությունը» խորագրով միջազգային համաժողովի ընթացքում հայտարարեց վարչապետ Նիկոլ Փաշինյանը՝ անդրադառնալով ընդդիմախոսների մտահոգություններին և հարցադրումներին, թե արդյոք Հայաստանի պատկան մարմինների իրավազորությունը գործելու է «Թրամփի ուղի» երթուղու նկատմամբ:
Նիկոլ Փաշինյանը նշեց՝ ընդդիմախոսների շրջանում մտահոգություններ կան նաև հատվածական սահմանազատման հետ կապված, քանի որ մինչև 2025 թվականի օգոստոսի 8-ը Հայատանն ու Ադրբեջանը պայմանավորվել են սահմանազատումն իրականացնել հյուսիսից հարավ, սակայն TRIPP նախագիծն իրագործվելու է Հայաստանի հարավում:
«Երկաթուղու և այլ ենթակառուցվածքների համար պետք է սահմանը սահմանազատվի այնտեղ, որտեղով անցնելու են դրանք: Այդ ենթակառուցվածքներում աշխատողները պետք է հստակ իմանան, թե որ երկրի տարածքում են աշխատում»,- նշեց Նիկոլ Փաշինյանը:
Հայաստանի վարչապետ Նիկոլ Փաշինյանը, ԱՄՆ նախագահ Դոնալդ Թրամփը և Ադրբեջանի նախագահ Իլհամ Ալիևը Վաշինգտոնում օգոստոսի 8-ին ստորագրել են հռչակագիր, որի 4-րդ կետով, մասնավորապես, սահմանվում է.
«Հայաստանի Հանրապետությունն աշխատելու է Ամերիկայի Միացյալ Նահանգների և փոխադարձաբար համաձայնեցված երրորդ կողմերի հետ՝ Հայաստանի Հանրապետության տարածքում «Թրամփի ուղի՝ հանուն միջազգային խաղաղության և բարգավաճման» («Trump Route for International Peace and Prosperity» (TRIPP)) հաղորդակցության ծրագրի իրականացման շրջանակը սահմանելու նպատակով։ Մենք հաստատում ենք մեր վճռականությունը բարեխղճորեն ձեռնարկելու բոլոր միջոցները՝ սույն նպատակին հնարավորինս արագ կերպով հասնելու համար»։