363.18
3 րոպեի ընթերցում
Երևանի պետական համալսարանի Մանկավարժության և կրթության զարգացման կենտրոնում Երեմյան ընկերությունների խմբի աջակցությամբ բացվել է Կիրառական սոցիալական մանկավարժության լաբորատորիա, որն իր ձևաչափով, հագեցվածությամբ և արտ-թերապևտիկ ուղղվածությամբ առաջինն է Հայաստանի բուհական համակարգում։
Երեմյան ընկերությունների խմբի հիմնադիր-տնօրեն Դավիթ Երեմյանի խոսքով՝ ընկերությունը մշտապես կարևորում է կրթական կառույցների հետ համագործակցությունը։
«Մենք մեր գործունեության ընթացքում առիթ բաց չենք թողել լինել կրթական կառույցների կողքին և հիմնել կրթական համալիր։ Եթե բիզնեսը և կրթությունը սինխրոն կարողանում են աշխատել, ընթացքում անպայման լավ գաղափարներ են ծնվում և ստեղծվում են իրական արժեքներ մեր երկրի համար, և այս լաբորատորիան վառ օրինակներից է»,- ասաց Դավիթ Երեմյանը։
Լաբորատորիայի նպատակն է ապահովել սոցիալական մանկավարժության ոլորտում տեսական գիտելիքների և գործնական հմտությունների համադրումը։ Այն հնարավորություն կտա ուսանողներին լսարաններում ստացած գիտելիքները կիրառել գործնական միջավայրում և ձեռք բերել մասնագիտական անհրաժեշտ կարողություններ։
ԵՊՀ ռեկտոր Հովհաննես Հովհաննիսյանը կարևորել է լաբորատորիայի ստեղծումը՝ ընդգծելով մանկավարժության և մանկավարժական գիտելիքների դերը։
«Այս լաբորատորիան առանձնանում է իր կարևորությամբ, որովհետև խոսքը գնում է մանկավարժության մասին, և մեր կառավարության կողմից հռչակված առաջնահերթությունների մեջ է մանկավարժությունը, մանկավարժական գիտելիքները։ Այստեղ մենք ուսուցանելու ենք նոր գիտելիքներ՝ եվրոպական ստանդարտներին համապատասխան»,- նշեց Հովհաննիսյանը։
Լաբորատորիայի վարիչ, դոցենտ Լյուդմիլա Հայրապետյանի խոսքով՝ այն ապահովելու է ուսուցման գործընթացում տեսության և պրակտիկայի կապը։
«Մեր կենտրոնի բակալավրիատի սոցիալական մանկավարժություն կրթական ծրագրի ուսանողները լսարաններում ստանալով տեսական գիտելիքներ՝ կարող են կիրառել այս գիտելիքները լաբորատորիայում և ձեռք բերել կարողություններ ու հմտություններ»,- նշեց նա։
Լաբորատորիայում գործելու են նաև արտ-թերապևտիկ գոտիներ, որտեղ սոցիալական մանկավարժները կկարողանան մոդելավորել շտկողական աշխատանքի ընթացքը՝ գործնականում ցուցադրելով, թե ինչպես համապատասխան թերապևտիկ տեխնոլոգիաների միջոցով կարելի է աջակցել զարգացման տարբեր խնդիրներ ունեցող երեխաներին։