2 րոպեի ընթերցում
Հյուսիսային Եվրոպայի և Բալթյան երկրները Հելսինկիում կայացած հանդիպման ժամանակ համաձայնության են եկել «Ուկրաինայի առաջնահերթ կարիքների ցանկ» (PURL) ամերիկյան նախաձեռնության շրջանակներում սպառազինությունների մատակարարումների փաթեթի շուրջ: Օգնության ընդհանուր գումարը կազմում է մոտավորապես 500 միլիոն դոլար և ուղղված է հակաօդային պաշտպանության ապահովմանը և Ուկրաինայի ռազմաօդային ուժերին աջակցությանը։ «Արմենպրես»-ի փոխանցմամբ՝ այս մասին հայտնել է Դանիայի պաշտպանության նախարարությունը:
Թագավորությունն այդ նպատակների համար հատկացնում է 400 միլիոն կրոն (62,31 միլիոն դոլար):
«Հյուսիսային Եվրոպայի և Բալթյան երկրների նվիրատվությունների համատեղած փաթեթը ցույց է տալիս մեր միասնական աջակցությունն Ուկրաինային: Ուկրաինայի մշտական աջակցությունն անխզելիորեն կապված է Եվրոպայի անվտանգության հետ։ PURL նախաձեռնությունն Ուկրաինային կապահովի կարևորագույն հնարավորություններով կարճաժամկետ հեռանկարում, և դա չափազանց անհրաժեշտ է այժմ», - ասել է Դանիայի պաշտպանության նախարար Տրոելս Լունդ Պոուլսենը:
Ինչպես հիշեցնում է Դանիայի պաշտպանության նախարարությունը, 2025 թվականի օգոստոսին Դանիան Շվեդիայի և Նորվեգիայի հետ համատեղ «օգնել է ֆինանսավորել սպառազինությունների մատակարարման առաջին փաթեթներից մեկը, որը ներառում էր հրթիռներ Patriot զենիթահրթիռային համալիրի համար»։
PURL (Prioritised Ukraine Requirements List) ծրագիրը մեկնարկել է հուլիսի 14-ին ԱՄՆ նախագահ Դոնալդ Թրամփի և ՆԱՏՕ-ի գլխավոր քարտուղար Մարկ Ռյուտեի կողմից։ Այդ մեխանիզմի համաձայն՝ Կիևի դաշնակիցներն Ուկրաինայի համար զենք են գնում ամերիկյան պաշարներից։