Բրազիլիայում ցուցարարները ներխուժել են COP30-ի անցկացման վայր

Բրազիլիայի Բելեմ քաղաքում տասնյակ ցուցարարներ փորձել են ներխուժել ՄԱԿ-ի Կլիմայի փոփոխության համաժողովի (COP30) տարածք։ «Արմենպրես»-ի փոխանցմամբ՝ այս մասին հայտնում է BBC-ն։

ՄԱԿ-ը հայտնել է, որ ցուցարարների և անվտանգության աշխատակիցների միջև բախումներ են տեղի ունեցել, որի հետևանքով բացի նյութական վնասներից անվտանգության երկու աշխատակիցներ թեթև վնասվածքներ են ստացել։

Անվտանգության աշխատակիցներին հաջողվել է հետ մղել ցուցարարներին։ Համաժողովի մասնակիցները ստիպված են եղել մնալ շենքի ներսում մինչև իրավիճակը կարգավորվի, իսկ ավելի ուշ նրանց թույլատրվել է դուրս գալ։ 

Ցուցարարների թվում եղել են բազմաթիվ բնիկ ժողովուրդներ։ 

Խիստ կանոնակարգեր ունեցող նման համաժողովում այս միջադեպն անվտանգության անսովոր խախտում է։ ՄԱԿ-ի տվյալներով՝ Բրազիլիայի և ՄԱԿ-ի իշխանությունները հետաքննում են միջադեպը։

Համաժողովն առաջին անգամն է անցկացվում Բրազիլիայում։ Վայրը վիճահարույց որոշում է եղել մի շարք պատճառներով, այդ թվում՝ Ամազոնի բնակիչների պատճառով, որոնցից շատերը բարձրաձայն քննադատում են կլիմայի փոփոխության և անտառահատման հետևանքով իրենց տներին հասցված բնապահպանական վնասը։

COP30-ի կլիմայական համաժողովին մասնակցում են գրեթե 200 երկրների պատվիրակներ։ Համաժողովը մեկնարկել է նոյեմբերի 10-ին և կտևի մինչև նոյեմբերի 21-ը։