2 րոպեի ընթերցում
Հայաստանի Ներքին գործերի նախարարությունը 2025 թվականի առաջին 9 ամիսների ընթացքում՝ նախորդ տարվա նույն ժամանակահատվածի համեմատ, արձանագրել է թմրամիջոցների ապօրինի շրջանառության դեպքերի հայտնաբերման թվի 18.1 տոկոս աճ:
«Արմենպրես»-ի փոխանցմամբ՝ այս մասին այս մասին Ազգային ժողովի մշտական հանձնաժողովների համատեղ նիստում «ՀՀ 2026 թ. պետական բյուջեի մասին» օրենքի նախագծի քննարկման ընթացքում հայտնեց ՀՀ ներքին գործերի նախարար Արփինե Սարգսյանը:
«Առգրավվել և ապօրինի շրջանառությունից դուրս է բերվել 415 կգ 281 գրամ տարբեր տեսակի թմրամիջոց, ինչը կրկնակի ավելի է նախորդ նույն 9 ամսվա ժամանակահատվածի համադրությամբ: Նախորդ տարվա 9 ամսվա կտրվածքով մենք շրջանառությունից հանել էինք շուրջ 205 կգ թմրամիջոց»,-ասաց Սարգսյանը:
Նախարարը նշեց՝ ուշադրության կենտրոնում են հատկապես սինթետիկ տեսակի թմրամիջոցները, որովհետև դրանք առավել մեծ վնաս են հասցնում մարդկանց առողջությանը:
«Առգրավված թմրամիջոցներից 37 կգ 175 գրամը սինթետիկ տեսակի են: Ընդհանուր առմամբ միայն ոստիկանության կողմից հաշվետու ժամանակահատվածում՝ 9 ամսվա կտրվածքով, առգրավվել են 290 կգ 683 գրամ տարբեր տեսակի թմրամիջոցներ, ինչը շուրջ 128 կգ-ով ավելի է նախորդ տարվա համադրությամբ հենց ոստիկանության արձանագրած ցուցանիշներից»,- նշեց ՆԳ նախարարը:
Ազգային ժողովի մշտական հանձնաժողովներում ընթանում են «ՀՀ 2026թ․ պետական բյուջեի մասին» օրենքի նախագծի քննարկումները: Ներքին գործերի նախարարությանը Հայաստանի պետական բյուջեից 2026 թվականին կհատկացվի 102 մլրդ 644 մլն դրամ: