Վարդան Ղուկասյանի տնային կալանքը երկարաձգվել է ևս երեք ամսով

Լիազորությունները կասեցված Գյումրի համայնքի ղեկավար Վարդան Ղուկասյանի տնային կալանքը երկարաձգվել է ևս երեք ամսով։

«Արմենպրես»-ի հաղորդմամբ՝ հոկտեմբերի 13-ին դատարանը բավարարել է դատախազների համապատասխան միջնորդությունը։

Ղուկասյանի պաշտպանները միջնորդել էին նրա նկատմամբ կիրառել վարչական հսկողություն, սակայն դատարանը որոշել է պահպանել տնային կալանքը։

Ղուկասյանը մեղադրվում է խոշոր չափով կաշառք ստանալու համար։ Ըստ իրավապահների՝ պաշտոնը ստանձնելուց մի քանի ամիս անց նա գործարար Սևակ Գոմցյանից պահանջել է 4 միլիոն դրամ՝ արդեն կառուցված ապօրինի շինությունն օրինականացնելու համար։

Ղուկասյանը մեղադրվում է նաև պաշտոնական դիրքի չարաշահման և փողերի լվացման համար։ Այդ գործն առնչվում է նրա պաշտոնավարման նախորդ շրջանին՝ 2000-ականներին։ Նրա նկատմամբ իրականացվում է նաև ապօրինի գույքի բռնագանձման վարույթ։ Օրերս Ղուկասյանն արդարացվել էր խուլիգանության վերաբերյալ առանձին գործով։